Kumin April thla atangin thingtlang-ah Sports Training kalpui tan a ni dawn

Sports Minister Lalnghinglova Hmar chuan April, 2024 atangin thingtlang-ah Sports Training kalpui tan a nih dawn thu leh Football Field siam mekte chu a tet hlawm avangin tihzauh dan an ngaihtuah thu House a hrilh.

Nimin-a Mizoram Legislative Assembly thutkhawm ah Member te zawhna leh zawhbelhna dang te chhangin April 1, 2024 atangin thingtlang kilkhawrah Training kalpui a nih dawn thu Sports Minister Lalnghinglova Hmar chuan a sawi a, “Coach-te a tangkai thei ang bera hman kan tum a, anmahni nen pawh Meeting kan nei tawh. Thingtlang kilkhawr thlen kan duh a, a duh tan a dil theih. An dila hmun danga Ccoaching an kalpui a nih loh chuan kan kaltir zel ang,” a ti a. Sports infrastructure chu sum neih chuan din belh a that thu pawh sawiin, “Chutihrualin, State sawrkar tum ve tur chi ah chuan kan insum hret ang. Hmun dang atanga kan pawisa ngai lova tih theih a awm chuan kan ti ang. Kan insum rih hret dawn,” a ti a, infrastructure awm sa hman tangkai tumin theihtawp an chhuah dawn thu a sawi bawk.

Sports Minister chuan Aizawl khawpuia Smart City sum hmanga Field siam mekte chuan International Standard an phak loh thu sawiin, “Sum sen a tam si a, National Standard pawh tling loa siam hi a uihawm. Kan enkual a, a theih dan ang anga tizau turin hnathawktute kan hrilh,” a ti a. Footbal Field hi FIFA duh dan chuan metre 105 x 68 tur a nih thu leh International Standard size chu metre 100 x 64 a nih thu pawh sawiin, Edenthar Veng-a Field siam mek chu metre 45 x 90 niin a senso tur chu cheng vbc. 8.8 a nih thu te; Chite Veng-a siam mek chu metre 100 x 52 niin a senso tur chu cheng vbc. 8.9 a nih thu leh cheng vbc. 6.81 senna tur Hlimen Veng-a siam mek chu metre 45 x 90 a nih bakah Tuivamit-a siam mek pawh 45 x 90 a ni tih a sawi a. Hetihlai hian Keifang-ah cheng vbc. 5.38 in International Standard Size leh Lengpui-ah cheng vbc. 5 sengin FIFA duh dan anga zaua siam a ni thung tih a sawi bawk.

Lawngtlai District-a Chawnhu Field siam nan YLA te thawhtir tawh pawisa pek leh si loh chungchang zawhna pawh chhangin Sports Minister Lalnghinglova Hmar chuan, Lawngtlai District Chawnhu Field-a hnathawh ah sawrkar nen thuthlung siam a ni lo tih a sawi a, Mizoram State Sports Council in kutthlakna a neih loh thu sawiin, inremna ziak dah a awmlo tih a sawi a. Ziaka awmlo sawrkar dan anga thuthlung inremna awm lo a hna an thawh chuan engtin zel nge an kalpui dawn a sawi thei rihlo tih Minister chuan a sawi bawk.

Comments

Popular News (Last 30 Days)

Bawngchawm tlang khualbuk rawktu nia hriat mi 2 man