International Women’s Day pualin Serchhip-ah Hmeichhia te humhalhna dan zirho a ni
District Hub for Empowerment of Women (DHEW) leh District Legal Services Authority te tangkawp buatsaihin International Women's Day pual hian Serchhip P&E Veng YMA Hall-ah hun hman a ni a, he hun hi Poshan Abhiyan-a District Coordinator James Lalremliana chuan kaihruaiin District Hub for Empowerment of Women (DHEW)-a District Mission Coordinator Lalvensanga chuan kalkhawmte chibai bukin, he ni hi hmeichhia te tana ni pawimawh leh chhinchhiahtlak a nih thu a sawi a. Hmeichhe dinhmun chawisan a la tulzia leh chumi kawnga Nu te pawimawhzia a sawi bawk. Serchhip-a Judicial Magistrate First Class Josangzeli Tlau pawhin Dan lama mipui te hriattur pawimawh sawiin Legal Awareness hun a hmanpui a. Kalkhawmte hnenah Dan kaihhnawih thil hrang hrang zirtirin, hmeichhia te humhimna Dan, ‘Protection of Women from Domestic Violence Act (PWDVA) 2005’ chungchang a zirtir bawk a ni.
Nimin-a he hun hmanna ah hian Serchhip khawpui chhunga MHIP Branch hrang hrang hruaitute telin DHEW-a Gender Specialist VL. Remruatpuii chuan Beti Bachao Beti Padhao (BBBP) chungchang a thara inhrilhhriat lehna hun a hmang a. MHIP Sub-Hqrs. Serchhip President Lianthangi pawhin thu a sawi bakah V. Lalruatsangi, Specialist in Financial Literacy, DHEW chuan lawmthu sawiin hun a khar a ni.
International Women's Day pual hian Serchhip-a One Stop Centre (OSC)-a thawktute chuan Serchhip District Jail-a hmeichhe tang mek te tlawhin hun an hmanpui bakah an hriselna dinhmun enfiah sakin thilpek an hlan a. He hunah hian Serchhip District Jail Superintendent C. Lalbiakthanga chuan inlawmna thu sawiin, OSC Serchhip-a Centre Administrator Lalchhanhimi chuan he ni lo chhuah dan leh khawvel puma hman a nih dan te, One Stop Centre leh Women Help Line nihphung leh hnathawh dan hrang hrang te a sawi a, hmeichhiate dikna leh chanvo humhim a tul dan hrang hrangte sawiin, Jail tang hmeichhiate hman turin Sanitary Pads, Damdawi leh an chhun eitur te a hlan nghal bawk.
Hemi hnu hian Helen Lalthanpui Pachuau, Para Medical Staff chuan Jail tang hmeichhiate leh thawktute hriselna a endik sak nghal a, tun dinhmunah Serchhip District Jail-ah hian Hmeichhia tang 7 awm mekin an zinga pahnih chuan nau an pawm a ni.
Comments
Post a Comment