Covid-19 leng vanga sum hmuh tur hmuh loh zat cheng vbc. 2370.80 a ni tih Chief Minister in a sawi

Chief Minister Lalduhoma chuan, hun pangngaia Mizoram sawrkarin central atanga sum a hmuh tura beisei, Covid-19 leng vanga a hmuh loh zat chu cheng vbc. 2370.80 a ni tih a sawi a. Chief Minister chuan Covid laia sum hmuh chu Finance Department kaltlang lo a tam thu a sawi bawk.

Nimin-a Mizoram Legislative Assembly thutkhawm ah MNF Member Robert Romawia Royte zawhna chhangin Finance changtu Chief Minister Lalduhoma chuan hun pangngaia Mizoram sawrkarin Central atanga sum a hmuh tura beisei, Covid-19 leng vanga a hmuh loh zat chu cheng vbc. 2370.80 a ni tih a, sum hmuhna tura ngaih hmuh tak lohna Chief Minister sawi danin, 2019-2020 sawrkar kum chhungin Share of Taxes-ah vbc. 867.39; kum 2020- 2021 chhungin Share of Taxes-ah vbc. 957.41 leh 15th Finance Commission Special Grants-ah vbc. 546, a vaiin cheng vbc. 2370.80 a ni a. Covid avanga Mizoram in sawrkar laipui tanpuina a dawn zat chu cheng vbc. 90.63 a ni a. Heng bakah hian 'For Management and Control of Covid' hnuaiah National Health Mission atangin grant engemawzat dawn a nih thu leh Corporate Social Responsibility hnuaia sumfai leh bungraw dawn te Finance Department-in a hriatpui loh engemawzat a awm tiin Chief Minister chuan a sawi bawk.

Zawhna neitu Robert Romawia Royte chuan, Covid len vanga Mizoram sawrkarin sum a hmuh tura a ngaih a hmuh tak loh hi tuna Assembly House-a chhan dan leh RTI hmanga Finance Department-a zawhna chhan dan a inang lo tih sawiin, RTI hmanga zawhna Finance Department-in February 19, 2022-a a chhan dan chuan sum hmuh tura ngaih hmuh loh hi cheng vbc. 2632.58 tih a ni tih a sawi a. Share of Taxes-ah 2020-2021 chhungin cheng nuai 1093.73 hmuh a ni lo ti a chhan a ni tih a sawi bawk a. Tuna House-a chhanna nen a inang leh si lo a, a khawi emaw zawk zawk hi a dik lo a nih chuan a pawi hle, a ti a. Covid avanga sum hmu teuh anga sawi thin pawh House-a chhanna atangin a lang tih a sawi a ni.

Chief Minister chuan RTI chhanna leh House-a chhanna inan loh chhan an hre lo tih sawiin, Covid laia sum hmuh tur ang hmuh loh leh thildang atanga hmuh hi Finance Department kaltlang lo a tam avangin Department-in a hriatpui vek lo tih a sawi a. Khatih laia an hriat theih chin hmangin an chhang nia a lan thu sawiin, an hriat loh te hriat belh zelin, a dik lo tih dik te a awm zel a, tuna House-a chhanna hi a dik zawk a rinawm tih a sawi bawk a. RTI-a chhanna pek hun lai aiin Accountant General atanga dawn Final Figure hnuah a chiang lehzual a, chumi hmang chuan tuna House-a chhanna hi a lokal tih a sawi bawk.

Chief Minister chuan Covid laia tanpuina dawn chu CM Relief Fund-ah leh a hranpaa Department danga lokal pawh a thahnem hle tih a sawi bawk a, a thlawna damdawi In thar sakna tur leh hmanraw leina tur te, thawktu lakbelh leh Laboratory dinna turte pawh a awm thu a sawi a. Za-a za Central sawrkar tum theih tura lehkha lokal chu Minister a dil thu leh, a hriat pawh a lo hre lo nia sawiin, mahse Register atangin an zawng hmu a, a hnuah umzui zelin NHM-ah a haichhuak ta niin Chief Minister chuan a sawi bawk a. “A lawmawm tehlul nen, an lo dah mai mai a,” tiin hetiang lama tanpuina awm thei tur kha sawrkar khan a ngaih-ven vak lo nia a ngaih thu a sawi a, a thlawna dawn tur tam kha an dawng thei lo tih a sawi bawk a. RT-PCR khawl te pawh lei a tum thu leh an duh loh thu sawiin, khatihlaia MLA Zodintluanga’n a lei pawh rei tak an hmang tha duh lo niin a sawi bawk.

Hetiang a nih avang hian Finance Department-in a hriat chin chu tlemte a nih thu Chief Minister chuan sawiin, tanpuina hmuh hi Department hrang hrangah tam tak a awm a, a kimchang taka hriat duh chuan Department zawng zawngah an zawh a ngaih dawn thu pawh a sawi bawk.