Chapchar Kut hlut dan ngaihtuah a tul

Mizo ten Kut chi thum kan neih zinga tun thleng kan la hmanlar ber Chapchar Kut chu kumdang ang bawkin kan lo hmang zo leh ta a, kumin hian Serchhip bikah chuan thil thar leh danglam lutuk awm lovin mipui ten an beisei thin ang ngeiin ‘Phullem chung ah’ Chapchar Kut hi kan hmang a, kan Mual in min dawl zoin kumdang-a harsatna kan tawh thin tam tak kan tawk lo thung niin a lang a, mipuite pawhin kan Phullem kan roh in kan dimdawi hle a, hetiang bawk hian sawrkar in mipuite tana hmasawnna hna a thawh te hi neitu rilru pu in enkawl ila, a tichhetu ni lo a a venghimtu kan nih zui zel hi a tul hle a ni.

Chapchar Kut kan hman dan thu ah mi hrang hrang ten ngaihdan hrang hrangte kan nei a, kan duh ang diak diakin kan hmang vek lo ang tih erawh thil chiang sa a ni. Chutih rual chuan mipui ten a kum tela he kan Kut hi kan hlut deuh deuh nia a lan avang hian kan hman danah pawh ngaihtuahna kan sen zau zel a tul a, ‘Tunhma lama kan tih thin dan’ ti mai lovin kan pi leh pu te nundan tilang tur leh Mizo hnam nunzia chi hrang hrangte pholanna hun atan tun aia nasa lehzuala kan hman thiam zel te pawh a pawimawh chho zel dawn niin a lang.

Khawvel a changkang zel a, chhuan thar lo awm zelah kan nundan pawh a danglam zel a, hei vang hian kan pi leh pu te nundan chu kan kalsan tial tial a, kan hnam lam leh zai te, tunhma a naupang infiamna thlengin kan theihnghilh chho ta tial tial niin a lang. Heng kan nundan phung hrang hrangte hi thangthar ten an hriat theihna tur leh an hlut theihna tura kan Kut neih te hi kan hman tangkai a tul a, chuti a nih loh chuan kan Kut ngei pawh hian hlut a hlawh loh mai a hlauhthawnawm a ni.