Raltlan te a theih anga chhawmdawl tum niin Sawrkar thar in Silai Licence pekchhuah ala nei lo

Home Minister K. Sapdanga’n Myanmar, Bangladesh leh Manipur atanga raltlan lolut te chu a theih ang anga chhawmdawl chhunzawm zel tum an nih thu sawiin, sawrkar tharah Home Department-in silai license pekchhuah ala neilo tih House a hrilh.

Nimin-a Assembly thutkhawmah Tuirial bialtu MLA K. Laldawngliana zawhna chhangin Home Minister K. Sapdanga chuan Myanmar, Bangladesh leh Manipur atanga raltlan lolut te chu a theih ang anga chhawmdawl chhunzawm zel tum an nih thu sawiin, hemi chungchanga zawh belhna chhangin, February ni 9 thleng khan chhinchhiah chinah Manipur atangin raltlan 9248 an awm thu leh January ni 25 thleng khan Bangladesh raltlan 1167 an awm thu sawiin, Myanmar raltlan 32,161 an awm thu a sawi bawk a. Sawrkar hmasaah khan sawrkar laipui atangin raltlan tanpuina tur cheng vbc. 3 hmuh a nih thu a sawi bawk a ni.

Aizawl South-III bialtu MLA Baryl Vanneihsangi zawhna pawh chhangin Home Minister K. Sapdanga chuan sawrkar thar din hnuah Silai licence pekchhuah a la nih loh thu a sawi a, sawrkar thar chu thla thum (3) vel chauh la ni in silai chu ralthuam, uluk taka licence pek ngai a nih avangin mi hriatchian mang loh te hnena licence pek a la hun lo deuh a, nghah khawl deuh a nih thu a sawi a. Sawrkar hmasa lamin Silai licence chu phalrai deuh nia sawiin, chhinchhiah danin kum kalta khan 1,296 pekchhuah a ni a, a kum hmasa lehah 1,053 pekchhuah a ni tih a sawi a. Sawrkar hriat danin, silai lei mang lova licence zawrh kual a awm tih sawiin, licence pek belh zung zung a fel rih lo a, chinfel phawt a ngai a, sumdawnna ang hiala hman chu tha an tih loh avangin Silai licence awm mek ho thlithlai fel phawt nise an tih thu a sawi a, mumal taka kalpui a ni dawn tih a sawi. Mi thenkhat mamawh tak tak, inven nan, lo neitu an huan thlai ven nana silai mamawh te dan ngawt an tum lo tih sawiin, mamawh dana zirin pek zel tum a nih thu a sawi bawk.

Home Minsiter hian Assam leh Mizo-ram ramri chungchanga zawhna pawh chhangin, ramri chungchangah District Council hunlai atangin vawi 24 inbiakna a awm tawh tih a sawi a, Delhi, Guwahati leh Aizawl-ah ramri chung-chang inbiakna neih thin niin sawrkarin a bawhzui dan kimchang erawh a vawnhim rih a nih avangin tlangzarh vek a rem hrihlo tih a sawi bawk.

Comments

Popular News (Last 30 Days)

Bawngchawm tlang khualbuk rawktu nia hriat mi 2 man