Bana kaih Policy hnuaiah mahni ke a ding theilo te an banah kaiin kalpui an ni dawn - Chief Minister

Chief Minister Lalduhoma chuan 'Bana kaih (Hand Holding) Policy' hnuaiah mahni ke a ding theilo te an banah kaiin an kalpui dawn tih sawiin, kal tha duh lo te erawh an kai lui bik dawn lo niin a sawi a. Hand Holding Policy nena kalkawp thei Central scheme awmsa hrang hrang a awm thu a sawi bawk.

Nimin-a Mizoram Legislative Assembly thutkhawm-a Budget a tlangpuia sawihona tlangkawmna a thu a sawi ah Finance changtu Chief Minister Lalduhoma chuan, Hand Holding Policy chu hming dang vuah an phallo tih sawiin, “Mahni ke a kal thei lo te, mahni ke a ding thei lo te an banah kaiin kan kalpui dawn a, kal tha duh lo erawh chu kan kai lui bik lovang, kaih a kal duh min zui duh te erawh kan kai dawn a ni,” a ti a. Hand Holding Policy chu Mizoram-ah a vawikhatna a ni tih sawi bawkin, “Sem a ni ve dawn lo a, chhungkaw tin a sem emaw, kan party chin zawng sem emaw ang chi tur a ni lova, beneficiary uluk takin Line Department ten an thlang ang, a kum khatna ah mi tam tak kan thlang lovang, mi hlawhtling ngei tur, entawntlak an hnathawhte pawh Video a tarlan ngam, inelna thianglim kan mipuiten an neih theihna tura kan hmahruaitu tur chutiang mite chauh chu thlan hmasak phawt kan duh a ni,” a ti bawk.

Chief Minister chuan Hand Holding Policy nena kalkawp thei tur Central Scheme awmsa chi hrang hrang awmin, kan State sum tam tak hman an tum loh thu leh Central Scheme thui tak nghenchhan tur a ni tih a sawi a. Hand Holding Policy kalpuina turin Bank hrang hrangte nen an inhmuh tawh bakah rampawn lama an hotute nen pawh inbiak a ni tawh tih sawiin, “Keini chuan Loan la tur reng reng hi kan duhsak zawng, kan party Worker te kan rawn thlang ve dawn tawh lova, tunhma chuan party Workers te an thlang thin a ni mai thei e, loan an la a, rulh pawh an tum lo, hman pawh an tum lo. An mimal pawisa emaw an ti nghal ngawt mai,” tiin anni chuan a hlawhtlin ngei tur chauh an thlan dawn thu leh a thlan mai ni lovin an enzui dawn thu a sawi a, anni pawh an lawm niin a sawi bawk.

Hei bakah hian Chief Minister chuan Industrialization an tan dawn tih sawiin, Investment Policy te duan thar a nih thu a sawi bawk.