Airport ram huamchhungah mimal ram nei an tam

Lengpui Airport ram huamchhungah mimal ram nei an tam tih Chief Minister leh GAD changtu Lalduhoma chuan a sawi.

Nimin-a Mizoram Legislative Assembly thutkhawm ah GAD changtu Chief Minister Lalduhoma chuan Lengpui Airport chu midang kutah hlan dawn chuan a ram chin buai tam tak a awm thu sawiin, mi thil ti thei tak tak te zingah LSC nei an awm tih a sawi a, heng te hi Revenue Department-in a rang thei berin Survey turin hma a la dawn tih sawiin, an zawh veleh an hung dawn tih a sawi a, GAD lamin a hung hna an buaipui dawn tih a sawi a. Lengpui Airport midang kuta hlan a nih dawn chuan a ram chin chian a tul thu sawiin, an hung dawn chuan khingtu pawh an ngah viau thei tih a sawi a, Dik lo taka ram inpekna a awm thin avangin inhlanchhawn lehzelna turah buaina tam tak a awm phah tih a sawi bawk.

Chief Minister chuan an Party Policy a an telh angin thlai tharte thlawhna hmanga thawnchhuah theih dan an zawn thu leh sawrkar tharah Lengpui Airport chu bungraw phur service theihna turin a hranpa-a ruahmanna a la awm rih lo tih sawiin, enzui vat tum a nih thu a sawi a. Lengpui Airport ah tunah chuan sum lut ve mahse, sum sen tawh atanga ngaihtuah chuan hloh a nasa a, invest tur ngaihtuah phei chuan an zo lo ni-a an hriat thu a sawi a. Rilru nata lak chi a ni lo a, leiba delh beh reng sawrkar tan chuan enkawl a harsa a, State dang pawhin an neih duh loh State pachhe berin a khuahbet tlat chu economy enin a fuh lo niin a sawi a, zirchiang tur Committee din ten May ni 3-a an thehluh dan a zirin ngaihdan an siam dawn a, Airport Authority of India emaw mimal kutah emaw hlanchhawn an tum dawn tih a sawi bawk.