Ram rawngbawlna hi Pathian rawngbawlna ropui tak a ni tih hre chungin hma kan la dawn - Chief Minister

Chief Minister Lalduhoma chuan, “Ram rawngbawlna hi Pathian rawngbawlna ropui tak a ni tih hre chungin hma kan la dawn a ni,” tiin Aizawl Kulikawn Hospital hmunah Khum 100 awm theihna Hospital thar sak an tum thu a sawi bawk.

Chief Minister hian Inrinni khan Kulikawn Hospital building thar leh a kaihhnawih building thar te sakna tur hmun tlawhin Deputy Medical Superintendent Room-a inkawmna buatsaihah Chief Minister chuan Aizawl Civil Hospital-in min dawl zo tawh lo hle tih sawiin, “ZMC hi mi nawlpui tan a lam a lo hla deuh bawk a, Kulikawn Hospital hmunhma hi a lo zauvin a lo rem hle mai nen, sawrkar chuan he hmunah hian khum 100 awm theihna Hospital thar sak kan tum ta a ni,” a ti a. Hospital building zau zawng hi 4559.25 sqm a zau niin a kianga Type 4 Quarters Block pakhat, Unit 6 awm leh Type 3 Quarters Block 2, Unit 12 awm thei tur te, Type 2 Quarters Block pahnih, Unit 6 nei thei turte leh tul dangte dah an tum dawn tih a sawi a. Hna te tha taka thawh a niha, a hun tak zawh a nih theih nan thawktuten theihtawp chhuah turin a chah a bawk.

Kulikawn Hospital Complex thar sak a nih theih nana bialtu MLA Lalchhuanthanga thahnemngaihna pawh Chief Minister chuan fakin, “Term hmasa atang tawhin a bei a, House-ah te a sawi chhuak a. Mipuiin kan mamawhzia a hriaa, a vei em em thin. Health Minister pawhin a pawimawhzia hriain theihtawp a lo chhuah bawk a, tunah a bul kan lo tan thei dawn ta a ni. Hun reilote chauh sawrkarna kan la kalpui a, hetih chhunga Health Minister hmalaknate hi a chhuanawm hlawm hle a ni,” a ti bawk.

Chief Minister chuan, sawrkar tharah mipuiten beiseina thar an nei lian tih sawiin, “Damna a thleng mek a, sawrkar hnathawkte pawh an phur a, hna tha thawk turin an inpeih at vek a ni,” a ti a. Chu chu hriain sawrkar pawhin theihtawp a chhuah dawn tih sawiin, “Ram rawngbawlna hi Pathian rawngbawlna ropui tak a ni tih hre chungin hma kan la dawn a ni,” a ti.

Chief Minister chuan, sawrkar laipui kuta ZMC pek tum chhan chu sum dinhmunin a zir loh vang a nih thu pawh he hunah hian sawiin, hetihlai hian Health Minister in sawrkar laipui a dawr hnuah Mizoram sawrkarin a enkawl duh phawt chuan sawrkar laipui chuan tanpui a hnial loh avangin ZMC chu sawrkar laipui kutah pek a ngai dawn ta lo tih a sawi a. Lengpui Airport erawh hnathawh tawhah sum indaihlohna a nasat avangin sawrkar sum neihin a tlin tawh lo tih a sawi a, a enkawl thei te hnenah hlan a ngai dawn ta niin a sawi bawk.

He hunah hian Health Minister Lalrinpuii pawhin thingtlang lama chengten inentir tura Aizawl an pan nasat avangi Aizawl Civil Hospital leh ZMC te a lun em em mai tih sawiin, hemi ti ziawm tur leh lam hnai zawka inentirna tha an hmuh theih nan District Hospital te an thuam tha chho mek tih a sawi a. Thawktute pawh a tul angin an siamrem dawn tih sawiin, ruahmanna dang an neih te pawh a tarlang bawk.

Chief Minister in Kulikawn Hospital a tlawhna ah hian Bialtu MLA Lalchhuanthanga, Chief Secretary Dr. Renu Sharma leh Health Department, Planning leh PWD Officials pawimawh te an tel a. Kulikawn Hospital Complex thar hi Ministry of DoNER Scheme NESIDS sum cheng vbc. 67.63 hmanga thawh tur a ruahman a ni.

Comments

Popular News (Last 30 Days)

Vawiin-ah HSSLC Exam result