Inthlan hmain Special Package hmuh beisei

Health Minister Lalrinpuii chuan Zoram Medical College (ZMC) tih changtlunna tur proposal chu Inthlan hma ngeia 1st instalment rawn pekchhuah hman an beisei thu a sawi.

Nimin-a a Pisa-a thuthar thehdarhtute a kawmna ah Health Minister chuan Zoram Medical College chu sawrkar laipui kut-a hlan mai chu a tha nia sawiin, hemi chungchang hi kumin January 17 khan Union Health Minister a sawipui thu leh ani chuan theihtawp a min tanpui lo inhuam in, State sawrkarin tha zawka a kalpui theihna tur atan a bik taka tanpuina ‘Special Grant’ min pek a tum thu a lo hrilh tih a sawi a. Special Package tur atana Project Proposal chu siamfel anih veleh Delhi lamah an chhukpui nghal tih sawiin, “Parliament Session buai tak karah Union Health Minister Pu Masukh Mandaviya in hun remchang min lo siamsak in, Ni 6.2.2024 khan ZMC tih changtlunna tur proposal chu kan thehlut fel a. Inthlan hma ngeia 1st installment tal min pek chhuah hman a tum thu a lo sawi a. Kan lawm hle a ni,” a ti.

Health Minister chuan ZMC enkawlna senso hi a hautak em avangin leh tunhnaiah Inspection an neih mai a rinawm avangin sum lamah harsatna an tawk tih a sawi a. “Kan harsatna te hriain kan Chief Minister Pu Lalduhoma chuan Immediate Relief atan cheng vbc. 1.4 min ruahman sak a. Hei hian Inspection kan neih dawn avanga harsatna zualpui min phuhruk kan beisei a. Kan Chief Minister chungah pawh lawmthu ka sawi a ni,” a ti bawk.