Leiverh siam hna thawhna tur sum pek phalna pe ta

Ministry of Road Transport and Highways chuan Aizawl pumpelh kawnga kilometre 2 leh a chanve leiverhna tur atan cheng vbc.1,313.28 a rawn sanction.

He thu hi Road Transport and Highways Minister Nitin Gadkari an nizan hmasa khan Social Media kaltlangin a puang a. Leiverh tur hi a thiang-a pahnih siam tur a ni a. Hei bakah hian National Highway No. 6-a Sairang leh Phai-bawk kawng kilometre 2 leh metre za siamna tura tel a. Hna thawh tur zawng zawng hi KM 4 leh metre 60 a ni dawn a ni.

He hna hi Aizawl khawpui chep lutuk tih ziaawmna atana ruahman a ni a. Lirthei veivak tawt lutuk tihnepna tur leh khawpui chhunga lirthei leh mipui himna atana ruahman a ni bawk. He hna hi thawh zawh a nih hunah chuan khawpui tawt avanga harsatna pawh a ziaawm phah beisei a ni a, Sairang leh Phaibawk inkar pawh KM 22 vela ti tawiin helai kawng tlan chhung pawh hi darkar khat leh a chanve in a tawi tawh dawn a ni. Chief Minister Lalduhoma chuan, tuna Union Minister in sawrkar hmasa lam atanga buaipui tawh, Aizawl Bypass Road Leiverh hnathawhna tur sum pekchhuah a ni tur chu lawmthu a sawi a ni.

Aizawl khawpui pumpelh siamna tur atan hian sawrkar kum kal lai Union Budget-ah PM-DeviNE hnuaiah cheng vbc. 500 dah a ni a. Hei hi Sihhmui atanga Aizawl-Thenzawl-Lunglei kawngpui pawh tura ruahman niin, KM 45 a thui tur a ni a. He ruahmanna-ah hian lei verh tur bik atan sum hi rawn sanction a ni. Hei bakah hian PM-DeviNE hnuaiah tho hian Mau tamna hmun atanga Mau phurh chhuahna tur kawng siamna atan cheng vc. 100 dah a ni bawk a. Hei hi Tuirial Airfield leh North Chaltlang inkar leh Lengpui leh Saiphai inkara Bamboo Link Road siamna tura ruahman a ni.