Forest Act leh a kaihhnawih CM hovin sawiho a ni

Mizoram Forest Act leh a kaihhnawih thil pawimawhte chu nimin khan Chief Minister Lalduhoma hovin a Pisa-ah sawiho a ni a, he hunah hianChief Minister chuan sawrkar policy pawi-mawh tak pakhat chu sawrkar leh mipuite indawrna te, Dan siam leh Dan kalpuina kawng hrang hranga mipuite tana kawng samkhai leh hriatthiam nuam buatsaih a nih thu a sawi a. “Chuvang chuan kan Dan hman mek tam tak te, Vawiin a kan sawiho mek Forest Act te pawh awlsam taka mipuite hriatthiam leh zir theih tura siam a tha hle a ni,” a ti a. Dan bu leh a siamthatna (amendment) lehkha engemawzat keng khawm a, bih kual tawn fo ai chuan, Dan thar pakhat, a hluia mi rin zui theihte awmna leh siam belh ngaite siam belh fel vek awmna ni nghal siam mai chu a hmangtute tan zir a awlsam hle dawn a ni, a ti bawk.

He thutkhawm a tel te hian Protection of Riverine Act, 2023 leh Mizoram Forest Act te chu Environment, Forest & Climate Change Department ten kengkawh se an ti a. The Mizoram Forest Act pawh Amendment document tam tak awm lo zawnga siamthat dan ruahmanna lo nei se, an ti a. Forest Department kaltlanga hmalakna dangte pawh he hunah hian sawiho a ni bawk.