AMC hotu ten Chief Minister kawmin an harsatna leh mamawh te an sawipui

Aizawl Municipal Corporation (AMC) Mayor Lalrinenga Sailo leh a thawhpuite chuan Chief Minister Lalduhoma kawmin AMC Corporators te hian ChiefMinister hi lawmpuina an hlan a. Chief Minister chuan Hualngohmun-a Solid Waste Management Centre leh Luangmual Industrial Growth Centre sak mekte chu uluk taka an vil dawn thu a sawi.

Niminpiah-a Chief Minister Pisa-a AMC hotute nen an inkawmna ah hian Chief Minister chuan Aizawl chhuah lam leh tlak lamah Aizawl by-pass Road a awm thar thuai dawn tih sawiin, chu chuan nasa takin Aizawl khawpui hi a zauh dawn tih a sawi a. Chhuah lama by-pass road thawhna tur phei chu Union Minister of Road Transport & Highways in a sanction tawh tih sawiin, Aizawl zauh zel nana hmalakna awm dang te nen a lo hrilh bawk. Hei bakah hian Chief Minister chuan bawlhhlawh paihna neih belh kan mamawh hle tawh tih pawh sawiin, tuna SASCI atanga Hualngohmun-a Solid Waste Management Centre thawh mek te, Smart City Fund atanga Luangmual Industrial Growth Centre a thawh mekte chu uluk takin an vil dawn thu leh a hunah, a nihna tur ang taka an zawh ngei an phut dawn tih a sawi a. Sihphir a thawh tur pawh chutiang bawkin an umzui ang tih sawiin, Aizawl Solid Waste Management Centre siam belh mek te an ngaihven thu a lo hrilh bawk a ni.

Chief Minister chuan tunhnaia Aizawl bawlhhlawh paihtuten an bawlhhlawh paihna man an hmuh loh rei avanga din an ngaih mai theih thu chanchinthar atanga a lo hriat thu pawh he hunah hian sawiin, hemi chungchang hi a hriat ruala Finance Department hotute abiak thu leh AMC bawlhhlawh paihna sum pekchhuah tur awm ang te pechhuak tura a hrilh nghal thu a lo hrilh bawk a ni.

Aizawl Mayor leh a thawhpuite hian Chief Minister Lalduhoma hnenah hian Aizawl khawpui zauh zel tura hma lak a tulna chungchang thlenin, sawrkara an dinhmun (status) hniam lutuk te, an lawmman beitham lutuk te leh State danga anmahni ang Corporator an phak loh dan te pawh an thlen bawk a. Central lama Urban Local Body Fund tam tak haichhuah tur awm chu tun aia nasa zawka haichhuah dan a awm theih thute pawh an sawi bawk a ni. Chief Minister hian Corporator ten an dinhmun siamthat an mamawhna, India ram hmun danga Corporator te nena an dinhmun khaikhinna te leh lehkha pawimawh dang te ziaka a hnena thlen turin a lo ngen a ni.