Central YMA in Free Movement Regime thiah a nih loh nan theihtawp chhuaha hmalak an rel

Central YMA chuan India leh Myanmar inrina laia mi chengte zalen taka an inkalpawh tawn theihna 'Free Movement Regime' (FMR) thiah a nih lohna turin theihtawp chhuaha hmalak nise an ti a. Hemi chungchanga sawrkar hmalakna chu an thlawp tlat thu an sawi bawk.

Tunkar Thawhtanni zan-a Central YMA Executive Committee thukhawm chuan tunhnaia India Sawrkarin India leh Myanmar inrina laia mi chengte zalen taka an inkalpawh tawn theihna 'Free Movement Regime' (FMR) tihbo a tum chungchang ngaihtuahin, Free Movement Regime hi September 26, 1968-a siam tawh, India leh Myanmar inrina ramri hrul lehlam ve ve a phalna (Visa) ngai lova KM 16 a thui inkalpawh tawn theihna tura duan a ni tih sawiin, he dan hi ramri lehlam ve ve-ah hnam khat, chi khat leh chhungkhat laina te an awm thin avangin awlsam taka an inkalpawh theihnan te, sumdawn tawnna leh ei leh bar zawn a awlsam zawkna avang te a siam a ni tih an sawi a. Mizote tan chuan kan unau Myanmar lama awmte nen inpawh taka kan tlawh tawn theihna remchang leh kan inpumkhatna atana tangkai em em a ni tih sawiin, hetianga Mizo hnam tana tangkai a nih laia India Sawrkarin thiah a tum chu tha an tih loh thu an sawi a. FMR thiah a ramri hungna siam a nih chuan Mizo hnam inpumkhatna nasa takin a ti chhe dawn nia sawiin, thiah a nih lohna turin theihtawpa hmalak nise an tih bakah thiah a nih lohna tura Mizoram Sawrkar hmalakna pawh an thlawp tlat thu an sawi a ni.

Kumin January 2 khan sawrkar laipui chuan Free Movement Regime (FMR) tihtawp tum a nih thu leh India leh Myanmar ramri hung tum a nih thu hi a puang a. FMR hnuaiah hian ramri a khawsate chu VISA ngai lovin ramri atanga KM 16 thleng zalen taka veivah phalsak an ni a, he Dan hi siam a nih hnuah kum 2016 khan ennawn niin kum 2018 khan India Act East Policy mil tura her rem leh a ni a. Amaherawhchu, Covid-19 len lai khan tihtawp lailawk a ni. FMR hnuaiah hian ram pahnih thuneitute chuan visa ngai lovin kum khat chhung dam tur phalna pein zalen taka zin theih a ni a, vawi khat ah chawlhkar hnih thleng cham theih a ni bawk.