ZPM in Nomination File tum; Party dang in chuh tum lo?

Serchhip Field Veng Village Council Seat ruak pakhat hnawhkhahna tura by-election neih turah nimin thleng khan Nomination Paper thehlut an la awm lo a. Eptu Party te chuan he inthlan hi chuh lo tura ngaihtuahna an sen thu an sawi.

Mizoram State Election Commission in Serchhip Field Veng VC-a Seat ruak pakhat (General) hnawhkhahna tura by-election tun thla ni 30-a a buatsaih tur chuh tum te tana hming pekluh hun hi Vawiin tlai dar 3:00 hian a tawp dawn a, he inthlanna chuh tur hian nimin tlai thleng khan Returning Officer hnenah Nomination Paper thehlut an la awm lo a, ZPM Party chuan an Candidate tur hi an tihfel tawh thu sawiin, nimin khan Nomination Paper lachhuakin Vawiin ah an thehlut dawn tih an sawi.

Hetihlai hian Serchhip East Block MNF a hruaitute chuan he inthlanna neih tur hi chuh lo mai tura rilru an siam mek thu an sawi a. He inthlanna neih chhan VC Member boralta chu ZPM atanga thlantlin a nih avangin amah ralna anga chuh loh mai an rilruk thu an sawi a. Serchhip Block Congress Committee President Lalramnghaka Kawlni pawhin Serchhip Field Veng VC-a by-election neih tur chu VC Member boralta ralna atan chuh loh mai an tum thu a sawi bawk.