C&I Minister in Lengte-a EPIP hmun a enfiah

Commerce & Industries Minister F. Rodingliana chuan Lengte a Export Promotion Industrial Park (EPIP) chu nimin khan tlawhin an hmalakna te a enfiah bakah EPIP chhunga Industry hrang hrang dinte tlawhin an hmunhma te chhipchiar takin a fang bawk.

Commerce & Industries (C&I) Minister F. Rodingliana chuan Industrial Park Area hmun thenkhat dan lova mimal in an luahte leh pass nei hialte pawh an awm ni a lang chu veiawm a tih thu sawiin, tha taka humhalh leh a nihna ang tur taka Industry bun nana hman tangkai a nih theihna tura buatsaih chu tih makmawh a nih thu a sawi a. Industry lama tui thalai leh mithiam zawk te'n hma an lak theihna tura kawng lo sial sak chu thil tul leh pawimawh a tih thu sawiin, remchang hmasa berah Industrial Area chhunga ram nei ni a inchhalte chu a huhova kohkhawm a, huan lo ram pass an neihte enfel a nih tur thu a sawi bawk.

Commerce & Industries (C&I) Minister chuan Industrial Park tihhmasawn leh humhalh nan a hungna (fencing) bakah a chhunga inkalpawhna (internal road) siamthatte chu hna hmasa ah neih a nih tur thu a sawi a. Industry neitu thenkhatte kawmin an harsatnate leh rawtna an thlente a ngaithlak sak a, a theih anga hma a lak pui tur thu a hrilh a ni.