Aizawl leh Lunglei in khawpui fai lawmman la

India ram khawpui fai inelna lawmman chu nimin khan semchhuah niin Mizoram atangin Aizawl leh Lunglei te chuan khawpui fai lawmman hi an dawng a ni.

India rampuma Faina Inelna lian ber, Swachh Survekshan 2023 lawmman semna hun hi nimin khan New Delhi-a Bharat Mandapam Plenary Hall, Pragati Maidan-ah neih a ni a, Lunglei Khawpui chuan ‘Clean City in the North East Zone Award (Below 1 lakh population)’ lawmman dawngin he Award hi Lunglei Municipal Council (LMC)-a Chief Executive Officer R. Vanlalsawta chuan a dawng a. Aizawl khawpui in ‘Clean City Award’ a dawng bawk a. He Award hi Urban Development & Poverty Aleviation Department-a Director Dr. Andrew H. Vanlaldika chuan a dawng bawk a. Nimin a lawmman semna hunah hian Mizoram atang hian LMC leh UD&PA Department atangin Official thenkhat te an tel bawk a ni.

Swachh Survekshan Award hi Ministry of Housing & Urban Affairs buatsaih a ni a. Third Party Monitoring Team ten an endikna atanga result hi siam thin a ni a. He intihsiakna ah hian India khawpui (Cities leh Urban Towns) te endik vek an ni a, Survekshan vawi 8-na 2023 chhunga inelnaah hian India ram chhunga khawpui 4477 an tel a ni.