Serchhip-ah World AIDS Day hman a ni; Serchhip District-ah HIV positive 518 hmuh an ni tawh

Khawvel puma HIV/AIDS dona ni, 'World AIDS Day' chu nimin khan khawvel pumah hman niin Serchhip-ah pawh District AIDS Control Society bultumin Serchhip Kawnpui VC Hall-ah he ni pual hian hun hman a ni a. Serchhip District-ah hian kumin March thla thleng khan HIV hrik kai 518 hmuh an ni tawh a ni.

Serchhip-a 'World AIDS Day' puala hun hman hi Serchhip-a Sr. Chief Medical Officer Dr. LP. Malsawma chuan khuallian nia hmanpuiin kumin-a 'World AIDS Day' ah hian 'Let Communities Lead' tih chu thupui-ah hman a ni tih sawiin, hei hian a tum ber chu vantlang leh mipui ten HIV/AIDS dona ah theihtawp kan chhuah tlan thar lehna tura hmalak leh inzirtir a nih thu a sawi a. Tunhma lama mipui ten HIV/AIDS kan hlauh thinna ang kha a tlahniam ta hle tih sawiin, Covid-19 in min chenchilh nasat lai phei kha chuan kan theihnghilh hman lek lek tih a sawi a. Amaherawh chu tunhnaiah ruihhlo hluar thar lehin HIV hrik kai pawh an pung chho leh nia a lan thu sawiin, kan inkaichhawnna lian tak pakhat ruihhlo dona ah sawrkar pawhin Task Force te dinin kawng hrang hrangah hmalak mek a nih thu a sawi a. Tuna hmalakna lian berah chuan ruihhlo la ti ve lo te venhim a nih thu leh tihchhin atanga ngawlveina a lo awm thin avangin tichhin lo tura kan fimkhur a tul thu a sawi bawk.

He hunah hian Family Guidance and Counseling Centre, Serchhip-a Councilor Rev. Rolungmuana Zadeng chuan thuchah sawiin Mizoram chu Kristian ram kan ni chungin rampum huapah a chhe zawnga pakhatna leh pahnihna dinhmun luahna kan nei tam hle tih a sawi a. HIV/AIDS chungchangah pawh mihring cheng zat atanga hri kai hmuhchhuah tamna kan nih thu leh hei hi Thisen enfiah atanga chhut chauh anih avangin thisen enfiah loh te nen phei chuan hri kai hi an tam hle turah a ngaih theih tih a sawi a. HIV/AIDS chungchanga Mizoram dinhmun tlangpui tarlangin, Mizoram-a HIV hri kai hmuhchhuah zingah ruihhlo ti leh mipat hmeichhiatna atanga kai an tam ber avangin heng lakah hian kan fimkhur a tul thu a sawi a. Heng te hi mahni duhthlanna a kan tih a nih thin avangin HIV kai leh kai loh te pawh hi kan duhthlanna a nihna thui tak a awm thu a sawi bawk a. Heng natna leh ruihhlo laka kan fihlim theihna turin Kohhran kan ngaih pawimawha Isua neitu kan nih a pawimawh thu leh a la kai lo te pawhin mahni leh midang ten an kai lohna tura theihtawp chhuah a hma kan lak a tul thu a sawi bawk a ni.

Serchhip-a 'World AIDS Day' puala hun hman hi Serchhip ICTC-a Counselor Lalnuntluangi Renthlei chuan kaihruaiin District AIDS Control Officer Dr. Lalnunhlima Khiangte chuan kum 1988 atangin thupui hrang hrang neiin he ni hi an lo hman thin thu a sawi a. HIV/AIDS a Serchhip District dinhmun tlangpui tarlangin, kumin March thla thleng khan mi 34,207 te thisen enfiah tawh atangin HIV hrik kai 518 hmuh an nih tawh thu leh thisen enfiah atanga za zela 1.51 in hri kai ang a nih thu a sawi a. General-ah mi 22,537 te thisen enfiah niin heng atang hian HIV hri kai mi 430 leh nu naupai enfiah 11,670 atangin HIV hrik pai 88 hmuh an nih thu a sawi bawk.

Mizoram State AIDS Control Society (MSACS) chhinchhiah danin kum 1990 atanga kumin September thla thlengin Mizoram-ah HIV positive 29,514 hmuh ni tawhin HIV hri kai hmuh tawh zinga 2,434 chu nu naupai niin a bak 27,080 chu mi pang-ngai an ni a. Mizoram-ah kum 2006 atang khan HIV hri kaite chu enkawlna mumal taka pek tan niin, hemi kum atanga kumin September thla thleng khan enkawlna dawng tura Anti-Retroviral Therapy (ART)-a inziaklut mi 23,857 awm tawhin mi 21,303-in ART hi mumal takin an la a, HIV kai zinga mi 4,703 te chu an boral tawh a ni.

Kumin bikah January atanga September thla thlengin mi 54,904 enfiah atangin HIV hri pai 2233 hmuh an ni tawh bawk.