Serchhip-ah MNF in Inthlanpui an thlirlet

Serchhip East Block MNF chuan nimin khan Serchhip Venglai-a Mizo Hnam Run-ah Assembly Inthlanpui thlirletna hun an hmang.
Nimin-a he hun hman hi an President H. Lalthianghlima chuan kaihruaiin he hun hmanpuitu Serchhip Bial a MNF Candidate J. Malsawmzuala Vanchhawng chuan Assembly Inthlanpui-a Vote tla chhiar zawh takah Serchhip bial mipuite duhdan lo lang ta chu an pawm thlap tih sawiin, “Kum 2028-ah chuan mipuite vote tlak leh an vote chakawm ni turin, tun atangin Campaign kan tan leh nghal a ni,” a ti a. Serchhip bial leh Zoram pum huap inthlan result enin, Sawrkar lai ninna boruak a sang hle tih a lang thei tih pawh sawiin, “Insiamthat ngai lai apiang ah insiam thain, MNF party chuan tha lehzuala mipuite rawngbawl hna thawk turin theihtawp a chhuah chho nghal dawn a ni,” a ti bawk.

Serchhip bial mipuiten duhsakna nasa tak a chungah lantira vote 5000 chuang an pe chu thinlung takin a lawm tih pawh sawiin, an Campaign chhungin mi thinlung tihnat an neih chuan ngaihdam an dil tih a sawi a, MNF party mipuite chu mite thla-muanpui, innghahna tlak leh midangte tana malsawmna thlentu nih zel tum turin a chah a. Mipuiten an aiawh tura an thlan Lalduhoma chu an lawmpui thu a sawi a, bial hmasawnna tur leh thil tha lamah te chuan theihtawp chhuahin an thawhpui zel dawn tih a sawi a, chutihrual chuan sawrkar kal dik lo tur ven kawngah erawh mipui aiawhin huai takin an ding zel dawn tih a sawi bawk.