MNF President banna Vawiin-ah ngaihtuah dawn

MNF President Zoramthanga chuan nimin khan an Party Sr. Vice President Tawnluia hnenah a nihna atanga banna a thehlut a, Vawiin hian an ngaihtuah dawn nia thu dawn a ni.

Mizoram Assembly Inthlanpui neih zawh takah MNF Party in sawrkarna an chelh zui theih loh tuk, nimin khan MNF President Zoramthanga hian an Party Sr. Vice President Tawnluia hnenah Party President atanga banna hi a thehlut a, banna lehkha ah hian Zoramthanga chuan Mizoram Assembly inthlanpui neih zawh takah a kaihhruai MNF party chuan hnehna an chang zo ta lo tih tarlangin, MNF President a nih angin hnehna an chan zawh loh chungchangah amah chu mawhphurtu a nih avangin a tih ngei tur ni-a a hriat angin banna hi a thehlut tih a sawi a, a banna chu pawm sak ngei turin a ngen nghal a ni.

MNF President atanga Zoramthanga'n banna a thehluh chungchangah hian zawhna chhangin MNF Sr. Vice President Tawnluia chuan, Zoramthanga banna thehluh hi Vawiin-ah an Party thuneitu sang, MNF National Core Committee (NCC) leh Political Affairs Committee (PAC)-in Aizawl-a an Party Pisa, Mizo Hnam run-ah an ngaihtuah dawn tih a sawi a ni.