Mizoram CEO Team ten Governor hnenah 'Due-Constitution Notification' an thehlut

Mizoram Assembly Inthlanpui 2023 neih zawh a nih hnuah Legislative Assembly thar din a nih theih nan Election Commission of India (ECI) aiawhin nimin khan Mizoram Chief Electoral Officer (CEO) Madhup Vyas IAS kaihhruai CEO Team chuan 'Due-Constitution Notification' chu Governor hnenah an hlan.

Mizoram Legislative Assembly, 2023 neih zawh taka thlan tlinte, thlan tlin an nihna Constituency leh an chuhna Political party chuanna ECI tihchhuah 'Due-Constitution Notification' hi CEO Team te hian Raj Bhavan-ah hlanin he hunah hian Governor Dr. Hari Babu Kambhampati chuan boruak muanawm tak hnuaia General Election to the Mizoram Legislative Assembly, 2023 felfai taka zawhfel a ni leh Dan leh thupekte tha taka kenkawha zawm a ni chu lawmawm a tih thu a sawi a. Inthlanna neih zawh tak chu State dangte tana entawntlaka mawi leh hmuh nuam a nih thu sawiin, chhawmnun zel a pawimawh thu a sawi a. Hlawhtling taka inthlanna buatsaih a nih theih nana hmalatu CEO leh a thawhpuite bakah inthlan kaihhnawiha theihtawp chhuahtute hmalakna fakawm a tih thu a sawi bawk.

Mizoram CEO Madhup Vyas IAS kaihhruai CEO Team-ah hian Addl. CEO-I H. Lianzela; Addl. CEO-II Amol Srivastava; Jt. CEO James Lalnunmawia, Dy. CEO-I R. Vanrengpuia, Dy. CEO-II Henry C. Lalrawnkima leh ACEO Vanlalhmachhuana te an tel a. Nimin-a 'Due-Constitution Notification' an hlanna hunah hian CEO Madhup Vyas chuan Governor hnenah hian inhmelhriattirna neiin inthlanna buatsaih kawnga hmalak dante a tarlang a ni.

Tarlan tawh angin November 7, 2023-a Mizoram Assembly Inthlanpui neih a Vote tla te hi niminpiah khan Mizoram District hrang hrangah chhiar a ni a, Mizoram puma vote tla zat, EVM a vote tla leh Postal Ballot hmanga vote tla zat belhkhawm chu 82.26% a ni a. Hei hian kum 2018 inthlanpuia vote tla zat 81.11% chu a khum a. He Inthlanpui-ah hian Seat 40 awm ah ZPM Party chuan Seat 27 lain Party mal-a sawrkar siam thei khawpin hnehna an chang a, Rorellai MNF Party chuan Seat 10 lain BJP chuan Seat 2 an lak bakah Congress Party chuan Seat khat an la bawk a ni.