MNF President banna thehluh pawm sak lo

MNF Party President atanga Zoramthanga banna thehluh chu ngaihtuah a nih hnuah pawm sak a ni lo.

Nimin khan MNF Sr. Vice President Tawnluia hovin an Party thuneitu sang MNF National Core Committee (NCC) leh Political Affairs Committee (PAC) te chu Aizawl-a an Party Office, Mizo Hnam Run-ah thukhawmin an party President banna chungchang hi an ngaihtuah a, an thutkhawm zawha thuthar lakhawmtute an kawmnaah MNF Sr. Vice President Tawnluia chuan an President Zoramthanga banna chu an pawm ta lo tih a sawi a, a banna an pawm loh thu hi amah pawh an hrilh nghal thu leh amah pawhin, 'hotute thu a nih chuan' ti-a lawm taka President mawhphurhna chu chelh zui leh a pawm thu tawngka in a lo hrilh tih a sawi a. Zoramthanga chu Laldenga boral hnua Vawiin thlenga MNF party chhum lo chat lova hruaitu a ni tih chu mipuiten hria se an duh thu a sawi a, Zoramthanga kaihhruaina hnuaiah harsa leh hun khirhkhan tak tak paltlang thei a an awm thu leh a hova Ministry vawi 3 an siam tawh thu sawiin, tun tumah erawh party dangte hun a thleng ve mai a ni, a ti a. Party dangin sawrkar an siam tur chu an lawmpui thu leh MNF chak lohna chu Zoramthanga chak lohna bik emaw, ama mawh bik emaw ah an ngai lo a, an Party hotute thukhawm chuan an zavaia mawh a ni tih an pawm thu a sawi bawk.

MNF Sr. Vice President Tawnluia chuan,  Zoramthanga ho ngeiin MNF party chu a kal zui zel a ni tih Zoram mipui, a bikin an party miten hria se an duh tih a sawi a, ama ho ngei hian MNF party chu Zoram mipuite enkawl turin a lo let leh ang tih chu an ring nghet tlat a, an thutlukna chu Zoram mipuite pawhin an tih tur dik tak a ni tih hriatpui a, an pawmpui ngei an rin thu a sawi bawk.

Comments

Popular News (Last 30 Days)

LPG man bithliah thar