Latest News

Mizoram Luidung-ah Magur man tur leh hmuh tur awm

Tunhnaiah Mizoram luidung hmun hrang hrangah Magur chi khat, Clarias Gariepinus man leh hmuh a nih thu hriat a ni a. He Sangha chi hi Sangha dang nen a khawi pawlh miahloh tur leh India sawrkar pawhin lakluh leh khawi a khap lai mek a ni.

Thulakna in a tarlan danin, Clarias Gariepinus hi Africa atanga khawi tan a ni a, metres 5 chuang ni theiin kgs. 60 a rit te an ni thei a. Sangha koham (voracious) tak niin Sangha dang ei chi a ni a. Sangha an hehin, an ei zawh loh tur thlengin an sehhlum thin a. Dil leh lui-ah pawh Magur awmna ah chuan Sangha mei bung leh Sangha ruang chhar tur a awm fo thin a ni.

Sangha dang angin Magur chi ho hian Samkhuih (gills) hmang chauhin boruak an hiplut lo a. Sangha dang ho hi chuan tuia boruak zawp (dissolved oxygen) chauh an hipluh theih laiin Magur chi (catfish) ho chuan khawmual boruak (atmospheric air) an hiplut theih avangin tui pâwnah pawh rei tak an dam thei a. Fur laiin Dil atanga chhuakin Dil dang leh luidung ah te chaw zawngin an chhuak darh thin a. Sangha dang ei tho Thaichhawninu te hi chuan an ei zawh bak Sangha dang bei lutuk lovin an hun tam zawk hi Puk karah te an tawm bo thin a. Magur chi ho hi kan luidung a awm tur a duan an nih loh bakah Sangha dang an bei nasa bik hle a. Kan luidung Sangha te hi an um tiau nasain a suat nasa hle a. Sangha chauh ei loin Chengkawl, Chakai, Ngharul leh a dangte thlengin a ei vek thei bawk a ni.

Comments

Popular News (Last 30 Days)