ATI-ah Training of Trainers on Gender Budgeting for Government Officials neih a ni

Directorate of Women & Child Development, Social Welfare, Tribal Affairs, Women & Child Development Department huaihawtin nimin khan ATI Auditorum-ah 'Training of Trainers on Gender Budgeting for Government Officials' chu neih a ni.

He hun kaihruaitu Addl. Secretary Social Welfare, Tribal Affairs, Women & Child Development Department Donnie-i chuan Sustainable Development Goals (SDG) 17 zinga 5-na chuan intluktlanna chungchang (Gender Equality) a ni tih sawiin, SDG in a hmachhawpte zingah kum 2030-ah chuan hnufual bik awm lova intluktlanna neih theihna tura hmalak a nih thu leh hmeichhia leh mipate intluktlan theihlohna awmte hnawhkhah a nih a, a inchenlo te inchen tir a lo nih theihna turin Gender Budgeting hi a tangkai hle tih a sawi bawk.

He Training-ah hian WCD Director Zoramthangi Chhangte chuan Sawrkar Department tinten an ngaihthah theih loh tur leh ralbang bik awm thei lo tura an tantlan a ngaihna chu Gender Budgeting a nih thu a sawi a. Gender Budgeting atana hma la tur Nodal Department chu Women & Child Development niin, Mizoram State puma atana Gender Budgeting atana Nodal Officer turin Women & Child Development Director pawh sawrkar pawmpuina-in ruat a ni tawh a, tunah hian Department tina Gender Budget Cell din a nih theihna turin chak takin hmalak mek a nih thu sawiin, ramin hma a sawn theihna tur chuan a hmei a pa, naupang atanga puitling thlengin tlabal bik lai awm lova an mamawhna zawn theuha tih chak an ngai a, chumi tichak tur chuan Gender Budgeting hi a pawimawh em em a ni, a ti bawk.