Latest News

ICFAI University Mizoram Convocation hmangin KC. Runremsangi hnenah DLitt(Honoris Causa) an hlan

ICFAI University, Mizoram chuan nimin khan Durtlang-a an Campus-ah Convocation Vawi 11-na hmangin zirlai 267 (UG&PG) ten Degree an nei thar a, Mizo ziathiam KC. Runremsangi hnenah DLitt(Honoris Causa) hlan a ni bawk.

He Convocation hi Governor leh Visitor of ICFAI Dr. Hari Babu Kambhampati chuan kaihruaiin Zirlai hlawhtling te chu hmalam hun eng tak leh chona lian tham zawk ten an lo hmuak nghal tih a sawi a. Nasa lehzual a tan la tur leh ram leh hnam tana thawhhlawk, khua leh tui tha ni turin a fuih a. ICFAI University Mizoram chu a hmasawnnaah te a lawmpui tih sawiin, NEP 2020 ruahmanna siam anga chak taka kal turin Vice Chancellor leh thawktute a chah a. Skill Development, Entrepreneurship, Reasearch leh Vocational Education lama thapui thawh turin a fuih bawk.

He Convocation-ah hian Dr. G. Satheesh Reddy, President, Aeronautical Society of India, DRDO Chairman hlui leh Secretary, Ministry of Defence(R&D) lo ni tawh chu Khuallian niin Khawvel-ah India ram mithiamten Science and Technology-ah an thawhhlawk tih a sawi a. Tunhma in India rama zirlai thiam filawr tak tak te USA, Europe leh ram hausa zawkah hna zawngin an chhuak thin a. Tunah erawh hei hi a inthlak hlawk tawh a, kalchhuak hmasa zawk te pawh India ramah lo kir lehin Start Up India hnuaiah awlsam takin bul an tan a, heng te hi hun reilote chhungin Cheng vbc. tam tak hu Company an ni tawh a, ‘Make In India’ hnuaiah rampawn atanga kan lei leh lakluh thin hmanrua, bungrua leh technology te siamin hmasawnna an thlen mek a. Mizoram thalai te pawhin Start Up India leh Make in India hnuaiah hian Mizoramin hlawhtlin theihna a neih lai te dapchhuakin hlawhtlinna an chan theih a ring tih a sawi bawk.

ICFAI University Mizoram Convocation-ah hian ICFAI Mizoram chuan Sawrkar atanga Honorary Doctorate Degree pek phalna an hmuh thu Chancellor Prof. Y.R.Haragopal Reddy chuan a puang a. He Degree hi mipui rawngbawlna huang te, zirna leh thil dangah te chawimawi phu te hnenah pek thin a ni ang tih a sawi a. A vawikhatna atan he chawimawina hi Mizo Folk Song & Dance huanga hna thawk tha, Padma Shree Award 2022-23 dawngtu KC. Runremsangi hnenah ICFAI University Mizoram chuan a hlan tih a puang nghal. DLitt (Honoris Causa) hi KC. Runremsangi hnenah ICFAI University Mizoram aiawhin Governor Dr. Hari Babu Kambhampati, Visitor to ICFAI University Mizoram leh Dr.G.Satheesh Reddy, President, Aeronautical Society of India te hian an hlan nghal a ni.

ICFAI University Mizoram-ah hian Zirlai 601 an awm mek a Course hrang hrang MBA, M.Com, MA, MSW, MSc (Geog), BBA, BCA, H&T, BA leh B.Com. te kalpui niin nimin-a Convocation-ah hian zirlai 267 (UG&PG) ten Degree an nei thar a ni.

Comments

Popular News (Last 30 Days)