Thalaite Khawnvar Society ten MNF puih tumin an Member mi 76 te lawmluh an ni
Nimin-a Serchhip Press Club-a thuthar thehdarhtute an kawmna ah hian Thalaite Khawnvar Society Chairman Michael Lalsanglura chuan tunlai khawvel changkang chho zelah thalai lehkha thiam leh a ngaihna hria, business Idea nei tha tak tak an pung chho zel tih sawiin, hun engemaw chen Social Media-ah hetiang mi te inpuih tlan theih nan hma an lo lak tawh thu leh kum khat vel kalta ah khan Society anga an kal thu an sawi a. An Society member te chu thalai an ni emaw, nilo emaw eizawnna line hrang hranga bul an tanna tur leh an eizawnna tih hmasawn emaw, tih changtlun kawnga tanpuina sum an hmuh theih nan te, bul tan tur ten bul an tan nân pawh State sawrkar tibuailo zawngin central atangin Project te siamin sanction nawrchhuah an tum thu an sawi a. Society-in a hma an lâkna turah hian sawrkarin a ngaih pawimawh sak a, hma lak sak rem a tih chuan tangruala Vote an tum thu leh an beisei ang ngeia MNF sawrkar ten lo ngaihsak a an lo thlawp avangin MNF chu a tlin leh ngei theih nan theihtawpa an puih dawn thu leh an Vote dawn thu an sawi a ni.
Thalaite Khawnvar Society hruaitute chuan tunah hian an Society-ah member 390 vel an awm thu sawiin, Serchhip District-ah mi 76 an awm thu an sawi a, Political Party an ni lo tih pawh sawiin, tlawmngai pawl leh Political party hrang hranga awm an nih thu an sawi bawk a ni.
Nimin-a thuthar thehdarhtute an kawm hnuah hian Serchhip District-a Thalaite Khawnvar Society Member mi 76 te hi Serchhip Bial-a MNF Candidate J. Malsawmzuala Vanchhawng chuan a lawmlut nghal a. J. Malsawmzuala Vanchhawng chuan Thalai Khawnvar Society in MNF thawhpui tura ke a pen chuan MNF chu thalaite tan sawrkar tha a nih zia a lantir tih a sawi a. Inthlanpui neih tura Political Party hrang hrangte Manifesto thlirin MNF chuan thalaite tan hmachhawp a nei lian ber tih pawh sawiin, Youth Oriented SEDP hnuaiah Mizo thalaite talent hrang hrang haichhuah a, eizawnna tlak a an hman theihna tura khaihchhuah an tum thu leh Central Scheme haichhuahna kawngah thalai ten puih an mamawh thu te a sawi bawk a ni.
Comments
Post a Comment