Serchhip-a SASCI sum hmanga hnathawh thenkhat sum sen nen a inphu lo nia an hriat thu ZPM in an sawi

ZPM Serchhip Block chuan kum 2022-2023 chhunga Serchhip Town chhunga SASCI atanga hnathawh zingah sum estimate leh hnathawh thenkhat chu a inphu lo hle nia an hriat thu sawiin, 15th Finance Commission atanga Village Council ten Rural Body Grant an hmuh chu a rang lama hman phalna pe tura sawrkar an phut thu an sawi bawk.

ZPM Serchhip Block Media Cell hruaitute hian nimin khan Serchhip Press Club-ah thuthar thehdarhtute kawmin SASCI sum hi kum 2022 2023 chhung khan Serchhip District atana hna chi hrang hrang panga (5) thawhna atan cheng nuai 1896 ruahman a nih thu leh Serchhip Town chhung bikah hna hlawm khat hnuaia hna peng hrang hrang 36 thawhna atan Rs. 2,69,00,021.10/- sanction a nih thu an sawi a. SASCI hnuaia Serchhip Town chhunga hnathawhte hi an theih ang chen chen an enfiah hnuah hna thenkhat chu RTI chhanna atanga a lan dan atangin Estimate sum leh a hnathawh inphu lo hle nia an hriat thu sawiin, Rs 14,00,000.18 senga DIET Complex bula H/P Culvert siam te; Rs 8,64,000.41 senga IOC Veng C. Lawmzuala In bula Footpath leh Handrailing siam te; Rs 8,77,005.30 senga Bilzel atanga Tlangnuam panna kawng RCC Balcony siam te leh Rs. 6,04,001.55 senga Kikawn to IOC road-a Lathoa In bula Retaining Wall siam te chu sum sen leh hnathawh a inmil lo hle nia an hriat thu an sawi a. Heng bakah hian Rs 5,56,003.99 senga New Serchhip-a Darhminga In leh Lalrinthanga Sailo In inkara Footpath leh Handrailing siam tur leh Rs 5,56,003.94 senga Darhminga In leh Thlanmual No. 1 peng inkara Footpath leh Handrailing siam tur te chu Handrailing awm tura ruahman a nih laiin Handrailing hi a awm si lo niin an sawi bawk. Heng bakah hian ZPM Serchhip Block Media Cell hruaitute chuan Rs 5,10,504.32 senga Construction of Link drain below C.Zonunsanga House at Hmar veng Serchhip leh Rs 4,28,000.05 senga Construction of Link drain near Vanlalveni House College peng hnuai at New Serchhip te chu hnathawh hmuh zawh loh a nih thu an sawi a bawk.

Heng hna hrang hrangte Department Work-a thawh ni si, MNF Party miten an thawk tlat zel nia lang chu Serchhip mipuite hmaah insawifiah tura an phut thu pawh ZPM chuan sawiin, “Kan CM in an Party campaign-na sum atana hman tur zingah SASCI hi a lo sawi tawh a, hei vang hian Party mi induhsakin intihlawm nan leh Campaign sum tuak nan an hmang ta tak tak emaw tih turin Serchhip khua chuan kan tuar hle niin kan hria,” an ti a. “Hnathawhna hmunah Estimate tarlan a ni lo te hian langtlang Sawrkar din an tum lohzia a tarlang chiang hle bawk,” an ti.

ZPM Serchhip Block Media Cell hruaitute chuan 15th Finance Commission atanga Local Body Grant, Rural Local Body Grant (RLB) atangin Serchhip Town chhunga VC hrang hrang 14 te'n kum 2020-2021 chhung khan sum Rs. 227,11,000 an hmuh thu pawh sawiin, Untied Rs. 33,53,000 chu April 4, 2022 khan VC te Account-ah lutin Tied 1st instalment Rs. 50,30,400 pawh Nov. 24, 2022 khan VC te Account-ah a lut tawh bawk niin an sawi a. Heng sum VC te Account-a awm tawh hi Vawiin thlengin VC te hian an la hmang thei lo nia sawiin, eng vanga la hmang thei lo nge tih zawhna an siam bawk.

An elpui Party dang te chuan ZPM Candidate-te sawichhiatna tel loin thu an post hlei thei lo chu a ni bera an hriat thu pawh ZPM Serchhip Block Media Cell hruaitute chuan sawiin, “Kan Sawrkar hrawn lai mek hian mipui sum an hman duhdan hrang hrangte kan ngaihtuah in mipui Sawrkar an niin kan hre thei lova, kut hnathawktuten an thawh hah man phu tawk hi an hmu ngai lo bawk a ni,” an ti a. “Party Sawrkar hnawla Kalphung thar, Mipui Sawrkar din min tiamtu ZPM Party Candidate-te min lo thlantlinsak theuh turin Serchhip leh Mizoram mipui zawng zawngte kan ngenin kan sawm tak meuh che u a ni,” an ti bawk.

Comments

Popular News (Last 30 Days)

Bawngchawm tlang khualbuk rawktu nia hriat mi 2 man