Sawrkarna siam ngei kan inbeisei - Lalduhoma

ZPM Leader Lalduhoma chuan Inthlan boruak thlirin sawrkarna siam ngei an inbeisei thu a sawi.

Nimin-a ZPM in Aizawl-a an Office-a Chhung Inkhawm an neih ah ZPM Leader Lalduhoma chuan sawrkarna siam an inbeisei thu hi sawiin, “Sawrkarna kan siam a nih chuan party vote ni lovin ram mipui - neutral te leh Pathian vang a ni ang,” tiin “Party sawrkar ni lo, mipui sawrkar din kan tumna kawngah min tawngtaisaktute leh kawng hrang hranga theihtawp chhuahtu zawng zawngte chungah lawmthu kan sawi,” a ti a. Inthlan kan hmachhawn zawh takah khan MPF awm leh awm lohna a dang hle nia sawi bawkin, hmun thenkhatah MPF ngaihtheih lohna a awm nia a lan bawk thu a sawi a. “Inthlanna thianghlim leh felfai Mizoram in a neih theihna tura theihtawp chhuahtu; a neitu pawh Kohhran leh NGO zawng zawng bakah Political party zawng zawngte kan nih avangin pawl hrang daih anga ngaih tur an ni lova, a neitu vek kan ni,” a ti bawk.

ZPM Leader chuan Sawrkar tha zawk nei turin mipui kan tuihal tih a lang nia sawiin, “Kum naupang deuh, vote nei thar leh upa zawk thlengin vote thlak turin phur takin kan penchhuak tlang a, vote pawh a tla tha hle. Neutral-in vote an thlak that avangin heng mite hi kan ram tidamtu leh siamthatu an ni dawn a ni,” a ti a. “Kumin ah MLA General Election kan han hmachhawn leh a, kan result neih tur hi kan tawngtai chhannaah kan ngai dawn a. ZPM hian chunglamah thawhpuitu kan nei a, hnehna kan chang a nih chuan ZPM party vang ni lovin Pathian vang leh neutral mipuite vang a ni ang,” a ti bawk.