Inthlan result puan ah eng pawh lo thleng se, puiting taka hmachhawn turin party mipuite chah

MNF Sr. Vice President Tawnluia chuan Assembly Inthlanpui a Vote chhiar hunah chak thei leh chak lo thei an ni tih sawiin, inthlan result puan hmabakah eng pawh lo thleng se, puitling taka hmachhawn turin party mipuite a chah.

Nimin-a Aizawl Mizo Hnam Run-a Inkhawm neih ah MNF Sr. Vice President Tawnluia chuan tluang taka MLA Election 2023 neihna tura State Election hotute leh Govt. Official te, Political Party te, TV leh Print Media leh MPF-te thawhhona ah lawmthu sawiin, Mizoram mipui 80% ten vote an thlak chu lawmawm a tih thu a sawi bawk a. “Kan hmabak vote chhiar hunah Chak thei kan ni a; Chak lo thei kan ni bawk. Khawvela kan awm chhungin damlohna leh harsatnate a awm thin. Hlimna leh lawm chang a awm bawk angin, eng pawh hmachhawn thiam turin i inbuatsaih ang u. Chu chu mi puitlingte tihdan a ni,” a ti a. “Hnehna kan chang a nih pawhin chapona leh midangte deuhna a awm thei. Kan party chu puitling takin i awm ang u,” tiin State sawrkar siam tur pawhin MNF Party chuan majority a neih ngei a rin thu a sawi bawk.

MNF Sr. Vice President chuan MNF sawrkar chu mipuiin an dem lova a hriat thu a sawi a. “Hripui te, raltlan leh harsatna hrang hrang kara sawrkar hmalakna chu a tha thawkhat a. Lalpa hming lam theia kan awm hi a lawmawm takzet a. Result chhiar hunah pawh lawm thiam turin i inbuatsaih ang u,” a ti a. MNF leadership chungchangah Chief Minister Zoramthanga chu mahni inthunun thei, mi taima leh huaisen a ni tih sawiin, “Tuna ministry a kaihhruainaah pawh mipuiah Anti-Incumbency (sawrkar lai thlak duhna) lian tak a awm lo hi a lawmawm hle a. Mizo nationalism keng nungtute hi mipuiten kan kutah sawrkarna an dah leh ngei dawn a ni,” a ti a. ECI-in vote chhiar hun tura Pathianni a ruat chungchangah, “Party leh Sawrkar ang chuan kan duh lo hle a, hma kan la zel a ni,” a ti bawk.

Comments

Popular News (Last 30 Days)

Bawngchawm tlang khualbuk rawktu nia hriat mi 2 man