Mizoram hnaih Myanmar-a inkahna thleng ah thi leh hliam engemaw zat an awm tawh

Myanmar ramchhung Mizoram hnaih ah nizan hmasa atang khan Myanmar Sipaite leh mipui Sipai, People’s Defence Force (PDF) te chu an inkap leh a, he thu buatsaih lai hian Civil mi pakhat a thih tawh bakah mipui tangrual Sipai 7 thi tawhin hliam tuar mi 20 an awm tawh a, Mizoram-ah raltlan engemaw zat an rawn lut tawh bawk.

Thudawn danin nizan hmasa atang khan Kachin Independent Army (KIA), Chin National Army (CNA) leh Chin Defence Force (CDF) tangrual chuan Rihkhawdar leh Khawmawi chuanchung-a Myanmar sipai te hmun chu lak tumin an kap a. Sipai lamin kapelt bawkin nimin thleng khan inkahna hi chhunzawm a ni a, nimin zing khan Rihkhawdar-a Myanmar Sipai hmun chu tangrual lam hian lain Khawmawi-a Sipai hmun lak tumin an bei chhunzawm leh nghal bawk a ni. Hetianga inkahna a thlen hnu nimin lam khan Myanmar indo thlawhna leh Helicopter-te chuan Rihkhawdar leh Khawmawi-ah bomb an rawn thlak bawk a, nimin khan raltlan pakhat, Zokhawthar-a khawsa raltlante chaw pe tura kal chu Myanmar lam atanga silaimu dawng fuhin a boral a. Zokhawthar VCP sawi danin he inkahnaah hian KIA leh PDF sipai mi 7 an thi a, Myanmar sipai thi zat hriat theih a ni lo thung a. KIA leh CDF hliam 20-te chu Mizoram lamah rawn luhpui-in an zinga na zual mi 7-te chu Aizawl lamah kalpui an ni.

Hliam tuar thisen mamawhte tan nimin khan Champhai District Hospital-ah mi engemaw zat te chuan tlawmngaiin thisen an pe a, nizan lam thleng khan inkahna hi la awmin thi leh hliam an awm erawh hriat belh a ni rih lo thung.

Champhai District Bawrhsap James Lalrinchhana chuan Myanmar-a inkahna chhuak thar avang hian Champhai District chhunga Bul-fekzawl leh Zokhawthar-ah an sahimna zawnga rawn tlanchhia an awm belh thu a sawi a. Raltlan rawn lut thar hi tun dinhmunah engzat chiah nge tih hriat theih loh tih sawiin, Inkahna hian Mizoram a hnaih em avangin Zokhawthar chuanhnuai (phaikuam) a awmte chu khaw lu lamah nimin zing khan a insawntir nghal a. Rawn lut thar te chhawmdawl tur hian District Disaster Management Authority te chuan eitur kengin Zokhawthar hi an pan nghal a ni.

Comments

Popular News (Last 30 Days)

Vawiin-ah HSSLC Exam result