Presiding Officer lakah FIR thehluh a ni

Tun thla November ni 7-a Mizoram Legislative Assembly inthlan vote thlak ni-a Aizawl South-III huamchhung, Muallungthu Polling Station-a Presiding Officer Lalremmawia Colney lakah FIR thehluh a ni.

Election Department hotute sawi danin Agriculture Department a Deputy Director Lalremmawia Colney laka FIR thehlut tur hian Election Commission of India chuan Election Department hotute a rawn hriattir a. ECI thu ang hian niminpiah khan Kulikawn Police Station-ah FIR hi thehluh a ni ta a ni. Hemi hma tun thla ni 11 khan Lalremmawia Colney hi a hna atanga chawlh lailawk tir a lo ni tawh bawk a. Election Commission hian a hna (Official Duty) a tih that loh avang leh document a phuahchawp (fabrication) vanga hremna lek tura kalpui ta an nih thu an tarlang.

Thudawn danin November ni 7-a Mizo-ram assembly inthlan ni khan mipuiin vote an thlak hmain he Polling Station a duty-te'n EVM hmangin vote an thlak chhin a. Chuta vote tlate chu nawtreh leh lovin zing dar 7:00 atangin mipui te chu Vote thlak chhunzawm tir an ni a. He thil fel lo, Polling Station-a vote awm zat aia tam vote tla ta hi he Polling Station-a Presiding Officer Lalremmawia hian a chunglama thuneitute hriattir lova thup tumin Polling Station a vote thlak zat chu a lo ziah belh a. Vote neitu hming (signature) lem a lo ziah chu man chhuah a ni ta a ni.

A hna atanga Lalremmawia chawlhtir lailawk leh a laka FIR thehluh a nihna chhan hi Muallungthu Polling Station-a dik lo taka a thiltih avanga Election Commission of India thupek anga tih an nih thu Agriculture Department Secretary in thupek a tihchhuah ah a tarlang a. A thiltih ni a puh hi Agriculture Department chuan a chhui chiang (Departmental Proceedings) dawn a, chumi chhung atana lo chawlhtir lailawk tir a ni.