Party ten Aizawl-ah Press Conference an nei

Nimin khan Mizoram-a Political Party hrang hrangte chuan Aizawl-ah thuthar thehdarhtute kawmin inthlanpui atana an ngaih pawimawh hrang hrangte an sawi.

MNF Media & Publicity Department hruaitute chuan nimin khan Aizawl Press Club ah thuthar thehdarhtute kawmin MLA inthlanpuia hnehna chang tura inbeihna kal chho mek chu Mizo Nationalism leh Lal hrim hrim chaknaa tuihalte inbeihna boruak lian berah an ngai tih sawiin, India ramchhung hmun tam tak leh Manipura Kristiante nekchepna lantir a, Biakbuk sawisa a, Kristiante tihduhdahna nei mektu BJP chuan sum hmangin miretheite retheina remchanga hmangin an thlem mek tih an sawi.

Aizawl West-I bial a ZPM Candidate TBC. Lalvenchhunga chuan nimin vek khan Aizawl Press Club-ah thuthar thehdarhtute kawmin MLA inthlan awm turah Party-te chuan thudik tawk lo an thehdarh nasa nia sawiin, ZPM leh BJP ten sawrkarna an siam dawn tiin mipuiah an puangzar nasa tih a sawi a. Mipuite chu lo awih lo tura ngenin, ZPM leh BJP chu an thawkdun dawn lo tih a sawi bawk.

MPCC Media Department chuan nimin khan thuthar thehdarhtute kawmin MNF sawrkar in an sawrkar kum 5 chhungin hna 7983 thalaite hmuhsak anga an inchhal chu thudik tawk chiah lo a nih thu sawiin, sawrkar hian hna 2218 chauh direct recruitment hmangin a la tih an sawi a. MNF Sawrkarna hnuaiah thalaite ruihhlo bawih ah an tang nasa in ruihhlo a hluar hle tih an sawi bawk.

Aam Aadmi Party (AAP) chuan nimin khan Aizawl Press Club-ah thuthar thehdarhtute kawmin Mizoram chu Education Sector lamah siam that a ngaihzia an sawi a, Punjab Education Minister Harjot Singh Bain chuan AAP in sawrkarna an siam hunah tun aia zirna tha nei turin theihtawp an chhuah tur thu leh a thlawna zirna an chhawpchhuah sak ang chu Mizoram ah pawh a kalpui ve theih thu a sawi bawk.