MZP in hnamdang pasal nei vote lo ngam turin ngen

Mizo Zirlai Pawl (MZP) chuan Mizo hnam damna turin hnamdang pasal nei Candidate hnawl a vote lo ngam turin Mizo mipuite an ngen tih nimin khan thuchhuah siamin an tarlang leh a. Congress Party-in Lunglei South Constituency Candidate tura an dah, Meriam L. Hrangchal pasal Dipen Zoliana chu hnamdang a nih thu tarlangin, “A intih Mizo leh Mizo lohte, khawtlang tana an tangkai leh tangkai loh te, Tribal Certificate a neih leh neih lohte hi kan issue a ni lova. Hnamdang dik tak a nih avangin, a nupui Meriam L Hrangchal hi Mizoram Assembly House-a thu turin kan hnam tan a him lo takzet a. Tuna kan hmalakna in awmzia a neih loh chuan, hnamdang pasal neite kaltlangin kan ram rorelna chu hnamdang kutah a luh mai a hlauhawm hle a ni,” an ti a. Mizo hnam damna turin hnamdang pasal nei Candidate hnawl a vote lo ngam turin Mizo mipuite an ngen tak meuh tih sawiin, “Vawi tam tak kan ngen chunga hetiang mi candidate a dah luitu party pawh MZP chuan tun inthlan lo awm turah hnawl ngam turin Mizo mipuite a ngen takzet a ni,” an ti bawk.