Mizoram Legislative Assembly Inthlanpui vawi 9-na Vawiin ah neih a ni dawn

Mizoram Legislative Assembly Inthlanpui chu Vawiin hian Mizoram pumah neih a ni dawn a, inthlanna neih tur atan hian inbuatsaihna engkim peihfel ni tawhin Serchhip District chhung Polling Station hrang hranga Duty turte pawhin nimin tlai khan an Duty-na tur hmun an thleng kim tawh a ni.

Mizoram State Legislative Assembly 9-na din tura Inthlanpui chu Vawiin hian Mizoram chhunga Assembly bial 40-ah neih a ni dawn ta a, Polling Station hla zual a Duty tur Polling Party 149 ten niminpiah lama an Duty-na tur hmun an pan hnuah nimin khan Polling Party dang zawng 1,127 te chuan an Duty-na tur hmun hi an pan ve leh a. Hriat theih chinah nimin lamah harsatna leh buaina liantham thleng awm lovin tukin dar 7:00 atang hian Polling Station hrang hrangah mipui ten Vote an thlak dawn a, tlai dar 4:00 thlengin Vote thlakna hun hi hawn a ni dawn a ni.

Serchhip District chhung Assembly Bial pathum-a Polling Station 88-a Duty turte chuan nimin zing dar 8:30 khan an Duty-na tur hmun an pan tan a, Despatch Centre hi Serchhip DC Office tualzawl-ah ruahman niin Serchhip District Election Officer David Lalthantluanga, Addl. District Election Officer Lalnundika, SDO (Sadar) Rebecca Laldinmawii Hrahsel leh Election Official dangten Polling Party kalchhuak te hi an buaipui a. Polling party te hian an chhuah hma hian Inthlan buaipuina tura bungrua an ken turte chu enfiahin hemi hnu hian Strong Room atangin Vote thlakna khawl te chu lakchhuah a ni a. Hemi hnu hian Polling Station hla te chhuak hmasa in Tuikum Bial-a Polling Station 8 leh Hrangturzo Bial-a Polling Station 7-a Duty turte chhuak hmasa berin Serchhip Bial-a Duty turte pawh chawhma dar 11:30-ah an chhuak tan leh bawk a, Serchhip Bial-a Duty turte hi chhuak hnuhnung berin chawhnu dar 1:30-ah Duty-na tur hmun panin an chhuak fel a ni.

Serchhip District chhunga Assembly Constituency 3-ah hian Polling Station 88 awmin Electoral Roll thar bera a lan danin Polling Station 88 zinga Voters tamna ber chu 22-Serchhip XII niin voter 976 an awm a. Voter tlemna ber Polling Station chu Tuikum Bial-a 31-Vanchengte niin Voter 95 an awm a. District pumah Service Voters 413 awmin Vote nei zawng zawng chu 54,679 an ni.

Tun tuma Inthlanpui neih turah hian Seat 40-ah inthlanna neih a ni dawn a, Candidate mi 174 awmin rorellai MNF Party bakah Congress Party leh ZPM Party te chuan Assembly Bial 40-ah hi chuh kim vekin Candidate 40 theuh an nei a, BJP chuan Candidate 23 neiin AAP-in 4 an nei bawk a, Independent Candidate 27 an awm bawk a ni. Tun tumah hian inthlan chuh tur mi 174 zingah hian Hmeichhia mi 16 an awm bawk a, heng mi 16 te hian Bial 18 an chuh dawn a, Hmeichhe Candidate 16 zinga 7 te hi Independent-a chuh tur niin Hmeichhe Candidate hi Inthlan hnuhnung ber kum 2018 ai khan pahnih in an tlem zawk a, kum 2018 MLA inthlanpui ah khan Candidate 209 awmin an zinga 18 chu hmeichhia an ni.

Tun tum Inthlanpui ah hian Aizawl District-ah Assembly bial 12 chuh turin Candidate 55 an awm a, Lunglei District-a Assembly bial 6-ah Candidate 27 awmin Champhai District-a bial 3-ah Candidate mi 10 an awm a, Kolasib District-a bial 3-ah candidate mi 13 awmin, Serchhip District-a bial 3 chuh turin Candidate 15, Lawngtlai District-a bial 3 chuh turin mi 13, Mamit District-a bial 3 chuh turin mi 14 leh Saitual District-a bial 3 chuh turin mi 11 an awm a, Siaha District-a Assembly bial 2 chuh turin mi 9 an awm bakah Khawzawl District-a bial pakhat-ah mi 4 leh Hnahthial District-a Assembly bial pakhat chuh turin mi 3 an awm a ni.

Vawiin a Vote thlak zawh a nih veleh Vote thlakna khawl te hi Strong Room panpui nghal an ni dawn a ni.