Kum upa te Vote thlak pawimawh zia zirtir an ni

Serchhip District Election Office buatsaihin nizan hmasa khan New Serchhip VC House-ah kum upa (Senior citizens) te zingah vote thlak pawi-mawhzia inzirtirna neih a ni.
He inzirtirna hun hi Serchhip District-a SVEEP Nodal Officer Lalnunmawii, DIPRO Serchhip chuan kaihruaiin Tuikum Assembly Constituency ARO Stephen Auhmun chu Resource Person atan hman a ni a, he hunah hian Mizoram Upa Pawl, New Serchhip North Branch member 40 chuang telin vote thlak pawimawhna tih thupui hmangin Resource Person hian thu a sawi a, kum upa te chu anmahni mai bakah an tu leh fate thinglungah vote thlak pawimawhzia tuhnghet a, chhungkua ah vote thlak hlutna zirtirtu ni turin a chah a. Kum upa te tana sawrkarin a bik taka ruahmanna a siam te sawi langin kum 80 chunglam, Polling Station thleng thei tawhlo te tan an In-ah kal chilha vote thlak tir an nih thu te; chu mai bakah sawrkar ruahmanna in vote thlak ni November ni 7 ah tar chak lo te chu an kalna tur motor ruahman a nih tur thu te pawh a sawi a ni.

He hunah hian Zawhna leh chhanna hun hman zui nghal niin Mizoram Upa Pawl, New Serchhip North Branch President Rualzakhuma chuan lawmthu a sawi a. Vote thlak pawimawhzia inzirtirna video clip tawi buatsaih a ni bawk.