Global Mizo Council in sawifiah

Ram leh hnam veite intelkhawm, Global Mizo Council chuan ram tina awm Mizote inpumkhat tur leh ram leh hnam kalsiam tur rel khawmna hmun Inpui turin Global Mizo Council buatsaih chu an thil tum a nih thu an sawi.

Nimin-a Aizawl a thuthar thehdarhtute an kawmna ah Global Mizo Council Chairman Vanlalngaia chuan hnam khat leh hming khat hnuaia awm a, lungrual taka luang za thei reng tur si, hnam kalsiam fuh loh avanga unau hmel hai an sawi ang maia luangza hleih theih loh avanga mite hmuhsit leh zuam a hlawh phah niin a sawi a. Hei hi Aizawla awm patling rual, Ram leh Hnam veite chuan a manganthlak an tih thu a sawi a. Greater Mizoram neih theih dan turte sawiin, Mizo Hnahthlak tia in koh thin chu thalo tiin, Mizo intih mai hi a tawk a ni, a ti. He hunah hian an Secretary Lianzuala chuan an pawl lo din chhuah dante leh an pawl hmalak tumna hrang hrang a tarlan bakah, tunhnaiah an pawl in Manipur leh Burma ram buainaa Frontline te an tlawh thu a sawi bawk.