CM bial nih duh leh duh lo inbuk dawn nia sawi thil ropui tak a ni lem lo - C. Lalramzauva
Nimin khan Serchhip Press Club-ah MNF Legal Board Chairman C. Lalramzauva hian thuthar thehdarhtute kawmin Serchhip Bial chuan vanneihna tak a neih thu leh Mizoram a Congress Sawrkar chhung zawngin Chief Minister bial a lo nih tawh thin thu sawiin, “Amaherawh chu CM bial kan nih avanga mipui ten hamthatna kan dawn tak viau erawh chu sawi tur kan ngah viau lo a ni thei e,” a ti a. ZPM Chief Ministerial Candidate Lalduhoma’n MPF Joint Platform-a “Serchhip bial hian duhthlan tur pahnih chiah kan nei – Chief Minister bial nih duh leh duh lo kan inbuk dawn a ni” tia a sawi chu Serchhip bial mipuite tan chuan thil ropui tak a ni lem lo niin a sawi a. ZPM party Chief Ministerial Candidate chu Serchhip bial mipui ten tum hnih (2) an lo thlantlin tawh thu leh a thusawi leh a thil tih te hmanga mipui ten amah chiangtaka an lo hriat tawh a nih thu a sawi.
MNF Legal Board Chairman chuan ZPM Chief Ministerial Candidate chu a thil lo tiam tawh- Thenzawl CHC-a Ultrasound khawl dah te, Puantahtu ten man man zawka an Puan tah te an hralh theih nana Private Company te dawr fel te, Thenzawl hmuna College din tura chak taka hmalak te, Lau Lui khuah leh chei that a kumtin Fish Festival neih thin leh Thenzawl chu State Capital atana siam leh hmalakpuitu tur Christian Millionaire biak fel chungchangah te engmah tih hlawhtlin a la nei lo niin a sawi a. Thenzawl CHC tana Ultrasound khawl lei loh chhan a sawi ah Dan in a khap anga a sawi chu thil pawmawm a ni lo tih sawiin, “Puantahtute chungchangah pawh hian Online Mizoramte nena thawhhona tur ruahman anga a insawi hi tute nge an nih tih pawh la hriat loh sumdawng pawl nge mimal tun thleng pawha Puantahtu ten an hmelhriat loh an ni,” a ti a. “Thenzawla College a din leh loh chhan a sawifiahna hi thil pawmawm a ni lo bawk,” tiin Laului khuah leh chei chungchang leh Thenzawl Mizoram Capital a din tur chungchang te phei chu sawi pawh a sawizui ngai ta lo hrim hrim niin a sawi bawk.
MLA Fund hman dan chungchang ah ‘Guidelines on Member of Legislative Assembly Local Area Development Scheme’ chuan hnathawh theih tur leh hnathawh phal loh te chiang taka a tarlan thu C. Lalramzauva chuan sawiin, ‘Grants (except for Health & Education) and loans’ tih a chuan thu leh hei hian chiang taka a lantir chu pawisa fai a pek (grants) leh puk tir (loans) te chu khawtlang huap hriselna lam leh zirna lam atan tih loh chuan pek phal loh a ni tih a sawi a. “Heti chunga Serchhip bialtu MLA in Pawl leh mimal hnena sum tam tak (Rs.71,43,630/-) a lo pe hi dan kalh a nih mai bakah mimal leh pawl tute emaw diklo taka an thinlung lei tumna rilru a in zep tel ani tih loh rual a ni lo,” a ti bawk.
Serchhip Bial-a MNF Candidate J. Mal-sawmzuala Vanchhawng chungchang pawh sawiin, “Pu J. Sawma hi he bial chhung atan mai ni lo Zoram pum huapa mi tangkai leh chhawrnaawm tak ni ngei tur a ni ang tih chu a chanchin in lo hriat leh a hmel in lo hmuh tawh atang te leh a thusawi in lo ngaihthlak tawh atang te khan in hrethiam tawh mai turah ka ngai,” a ti a. “Candidate dang te he bial chhung atana inpe te pawh mi tha leh fel tak tak an ni hlawm ang tih chu a hriat theih nain he bial chhung chhul chhuak, a te ber atanga a lian ber te tan pawha harsatna kan thlen ngamna tur leh englai pawha biak phaka awm reng tur a nih thu amah ngeiin a lo sawi tawh kha hre rengin bial chhung mipuite rawngbawltu atan a ni hi kan thlantlin ngei a tul a ni,” tiin Bial tana rorelna sang a thu tur pawha duhawm a nih thu a sawi bawk a ni.
Comments
Post a Comment