Campaign hun chhunga remna leh muanna vawnhimna ah Mizoram Police in lawmthu an sawi
Mizoram Assembly Inthlanpui neih tur chungchanga thuchhuah an siamah Mizoram Police te chuan Campaign hun chhungin State pawn atangin nitin VVIP tam tak an lo kal thu leh chung ah te pawh chuan harsatna pakhat mah awm lovin tluang takin Campaign hun hman zawh a nih thu an tarlang a, “Hei hian Mizoram in democracy a ngaihhlutna leh inthlanna muanawm tak neih a duhna a tilang a ni,” an ti a. Inthlanpui neih tur atana an inbuatsaihna leh hma an lakna te tarlangin, tun inthlanah hian Candidate 174 an awm a, heng Candidate-te himna hi Mizoram Police chuan a ngai pawimawh hle a, candidate tinte hi he hun pawimawh takah hian him taka an awm theih nan PSO pek vek an nih thu an tarlang bawk.
Mizoram Police thuchhuah chuan Nov. 7, 2023-a him taka vote kan thlak theih nan Mizoram Police chuan venhimna lamah ruahmanna a siam thu tarlangin, Civil Police atangin mi 1831, State Armed Police atangin mi 2527, Central Armed Police Force atangin mi 2700 te bakah Mizoram Home Guard atangin mi 160, an avia belhkhawmin mi 7218 te duty-a tihchhuah an nih thu an tarlang a. Heng duty-te hi Polling Station Duty, Sector Police Officers, NALAS (Checkpoints), Inter-State Border Check Posts, Static Surveillance Teams, Flying Squads, EVM Guards, Observer Security, Ssecurity for Candidates, CAPF/SAPF Liaison Officers, Quick Response Teams (QRTS), District Striking Forces, Control Room Operations, Area Domination, District Election Cell, PHQ Election Cell, Reserve Forces, Vehicle Security, Dispatch leh Receive Centre Security, Zonal Officer-te bakah ramri venghim leh tul dang ti atan hman an nih thu an tarlang a ni..
Vote thlak hun chhunga Mizoram remna leh muanna vawng him chhunzawm zel tura mipuite ngenin Mizoram Police chuan, “Boruak muanawm tak hnuaia vote thlakin India ram hmun dangte tana entawn tur chhawp chhuak leh turin kan ngen a ni,” an ti a. “Mizoram mipuite, Mizoram Police nena thawk hoa Police leh Election Official dangte thu zawm a, Election hlawhtling tak kan neih theih nana thawk tlang turin kan in sawm e,” an ti bawk.
Comments
Post a Comment