Zoramthar ten an MLA Candidate tur puangin Serchhip Bial-ah Rev. Dr. Zaichhawna Hlawndo

Zoramthar tia hriat, Lalpa Chhiahhlawh Intelkhawm te chuan Mizoram MLA Inthlanpui lo awm turah Bial 18-a an Candidate tur mi 16 an puang tawh a, Candidate tur hi an la neih belh zel an beisei tih an sawi.
Nimin-a Aizawl Press Club-a thuthar thehdarhtute an kawmna ah Zoram Thar Zofate Lairelna Inpui hruaitute chuan Lalpa Chhiahhlawh (MLA candidate) turte hi puangin Assembly Bial 18-ah Candidate mi 16 an neih tawh thu leh Rev. Dr. Zaichhawna Hlawndo leh Lalruatfeli Hlawndo-te chu bial pahnih ah an ding ve ve dawn tih an sawi a. Hming pekluh hun tawp thlengin Candidate tur hi an neih belh zel an rin thu leh tawngtaina nen an la dil belh mek zel tih an sawi a. Lalpa Chhiahhlawh Intelkhawm-te hian an Symbol chu ‘Zungbun’ a ni dawn tih an sawi bawk.

Tuna an Candidate neih tawh chinah Rev. Dr. Zaichhawna Hlawndo, Chaltlang Lily Veng chu Serchhip leh Hrangturzo Bial-ah dingin Lalruatfeli Hlawndo, Chaltlang Lily Veng chu Aizawl North-I leh Aizawl East-I ah a ding anga. Upa K. Lalrimawia, Zote chu Lunglei North-ah dingin Upa H. Biaklawma, ITI Veng chu Aizawl South-II ah leh T. Upa ZD. Dengngura, Lawngtlai chu Lunglei South-ah a ding ang. Phirthianga, Bungtlang South chu Siaha Bial-ah dingin K. Laldingliana, Tuikual North chu Aizawl West-II ah a ding anga, Zonunsanga, Pehlawn chu Tuivawl Bial-ah dingin Biakchhunga Chinzah, Lawngtlai chu Lawngtlai West Bial-ah a ding dawn bawk a ni.

Aizawl North-III Bial-ah Vanlalvena, Hunthar Veng dingin Serlui bial-ah Vanlalnghaka, Saipum a ding anga, Lalrinpuii Ralte, Chaltlang chu Aizawl North-II ah dingin Lalramdingngheti, West Phaileng chu Dampa Bial-ah a ding anga, Agnes Vanlalhmunsiami, Khawzawl chu Tuichang Bial-ah dingin Sapchhawna, Selesih chu Tawi Bial-ah a din dawn bakah Rothuama, Ramthar North chu Aizawl South-I Bial-ah a ding dawn bawk a ni.