MZP in Mizo Hmeichhia hnamdang pasal nei candidate-a dah tumna awm pawi an tih thu an sawi

Mizo Zirlai Pawl (MZP) chuan Assembly Inthlanpui neih turah Political party tinte hnamdang pasal neite Candidate-a dah lo tura vawi tam a ngen tawh chungin awmzia a nei tawklo nia an hriat thu sawiin, Mizoram leh hnam a him zel theih nan a tawp thlengin hmalak zel nise an ti.

MZP hian nimin khan Aizawl-a MZP Office-ah MZP General Headquarters Executive Meeting vawi 623-na neiin Hnamdang pasal nei MLA Candidate a dah chungchang te, Mizo hming hawha hnamdang sumdawng chungchang te, Manipur Zofate harsatna tawh chungchang leh pawl chhung thil pawimawh hrang hrang relin, Mizoram rorelna sang ber Assembly House-a thu tur MLA inthlanna lo awm turah Mizo Hmeichhia hnamdang pasal nei candidate tura dah tumna a awm chu pawi an tih thu an sawi a. MZP-in political party tinte hnamdang pasal neite Candidate-a dah lo tura vawi tam a ngen tawh chungin awmzia a nei tawklo nia an hriat thu sawiin, Mizoram leh hnam a him zel theih nan a tawp thlengin hmalak zel nise an ti bawk a ni. Hei bakah hian MZP General Hqrs. chuan Mizoram chhungah Mizo hming hawha hnamdang sundawng tam tak an awm leh an huangtau chho zel chu pawi an tih thu pawh sawiin, ILP kalpui danah pawh a sponsor-tu ten dan an zawm tawk lo leh hnamdang thlavang hauhtu an pung zel chu kan ram leh hnam tan a him nia an hriat thu an sawi a. Mizo hming hawha hnamdang sumdawngte dapchhuah chu a tul anga hmalak nise an ti bawk.

Manipur buaina avanga Zohnahthlak ten harsatna hrang hrang an tawh te pawh nimin a MZP thukhawm hian ngaihtuahin, an harsatna tawh hrang hrangah a tul anga puih a, a bik takin Zirlaite tawrhna hi theih ang anga tanpui nise tih a ni bawk.

Tun tum hi MZP General Hqrs. hruaitu thar thlan a nih leh hnua Executive thutkhawm neih hmasak ber niin kum 2023-2024 chhunga MZP General Hqrs. Appointed Secretary turte pawh ruatchhuah nghal an ni a. Appointed Secretary atan hian mi 8 ruatchhuah an nih bakah MZP Chanchinbu Editor atan David Lalromawia chu ruat a ni bawk.