South Chawngtui tuilakna Health Minister in a hawng

Cheng nuai 352 senga South Chawngtui Solar Pumping Scheme zawhfel tak chu Inrinni khan Health Minister Dr. R Lalthangliana chuan a hawng.

South Chawngtui Solar Pumping Scheme hi Jal Jeevan Mission (JJM) hnuaia Rs. 352,75,000/- senga siam niin nitin darkar 6-7 chhung tui pump thei tura ruahman a ni a. Tun dinhmuna an Reservoir neih len zawng chu litres 50,000 dawng thei niin Tui connection nei chhungkaw 159 chawm zo tura ruahman a ni.

South Chawngtui Solar Pumping Scheme hawnna hunah hian bialtu MLA ni bawk Dr. R. Lalthangliana chuan South Chawngtui khua in a mamawh em em, tui hnianghnar tak an neih theih nana nizung chakna hmanga tui pump na (Solar Pumping Scheme) tha tak hawn a ni ta chu lawmawm a tih thu sawiin, mipui tan thil chhinchhiahtlak tak leh hmasawnna ropui tak a nih thu a sawi. Health Minister chuan Covid hri leng leh hun harsa tak karah Mizoram-ah hmasawnna hmuh tur a tam hle chu thil chhinchhiah tlak tak a ni tih a sawi a. Hriselna a pawimawh zia sawiin, tui in tam leh insawizawi uar turin kalkhawmte chah bawkin tuihnar leh ram leilung hausakna te chu ram rohlu a ni tih hriaa, humhalhna kawngah mawhphurna sang tak an neih vek thu hre reng turin a chah bawk.