Serchhip District-ah Electoral Roll tlangzarh niin Vote nei thei mi 54,565 an awm mek

Kumin-a Electoral Roll ennawn hna tum hnihna chu zawhfel niin Serchhip District pumah Vote nei thei mi 54,565 an awm mek a ni.

Election Commission of India in a ruahman anga kumin October 1-a kum 18 tling chin te laa 2nd Special Summary Revision of Photo Electoral Roll, 2023 neih taka Final Electoral Roll hi nimin khan Serchhip District Election Officer leh District Bawrhsap David Lalthantluanga chuan Serchhip DC Meeting Hall-ah a tlangzarh a, Bawrhsap chuan Electoral Roll ennawn hna tluang taka thawh a ni leh Final Electoral Roll tlangzarh a ni ta chu lawmawm a tih thu sawiin, ERO, AERO, BLO leh Election Branch a thawktu te bakah khawtlang hruaitute, Political Party leh tlawmngai pawl, he Electoral Roll a puitlin theihna tura rim taka thawktu zawng zawngte hnenah lawmthu a sawi a. An thawhrimna avangin Electoral Roll felfai leh thianghlim tak kan neih theih phah a ni, a ti.

He hunah hian Serchhip Election Officer Lalrinsanga Hnamte chuan Serchhip District-a Electoral Roll dinhmun tlangpui sawiin, kumin August 2 khan Draft Electoral Roll tarchhuakin Electoral Roll ennawn hna hi thawh a nih thu a sawi a. Draft Electoral Roll nena khaikhinin Final Roll a General Voters punna zat hi 339 a ni a, Service Voters-ah erawh Vote nei thei mi pahnih in an tlem zawk thung a ni. Serchhip District pumah hian Assembly Constituency pathum (3) awmin Polling Station 88 a awm a, General-ah Vote nei Mipa 26,265 leh hmeichhia 27,887, an vaiin 54,152 an awm a. Service Voters 413 awmin Mipa 410 leh Hmeichhia 3 an ni a. Heng te nen hian Serchhip District chhung Assembly Bial pathum-a Vote nei thei zawng zawng chu Mipa 26,675 leh Hmeichhia 27,890 niin Vote nei thei zawng zawng hi 54,565 an ni.

Electoral Roll thar tlangzarh a nih hnu hian kum 18 tling chin te tan chuan hming thun thar (Continuous Updation) hi kalpui chhunzawm a la ni dawn a. Inthlanpui neih hun tur puana Candidate te inhnuhdawh theih ni hnuhnung ber-Last date of Withdrawal of Nomination atanga chhiar leta ni 10 ralhmain Electoral Roll hi peihfel vek tur a ni. Nimin-a Electoral Roll tlangzarh tak hi Political Party hrang hrang aiawhte hnenah semchhuah nghal niin ERO ten Electoral Roll enfiah hna thawh chhunga an hmalak dan te an tarlang bawk a ni.