Kelsih-ah Tribal Research Institute (TRI) hawn a ni

Ministry of Tribal Affairs hnuaia Kelsih-a Tribal Research Institute (TRI) sak thar chu nimin khan Social Welfare, Tribal Affairs, Women & Child Development Department changtu Minister Er. Lalrinawma chuan a hawng.

Khawvel changkanna kal zelah kan hnam nunphung leh ziarang te zawi zawiin thildangin a rawn thlak mek a. Research Institute chu kan hnam chin dan, kan Culture leh Traditions vawnnun zel nan leh inzirna hmun ni turin a tangkai hle dawn tih he hunah hian Minister chuan sawiin, Hnam tenau zawk chimral kan nih loh nan Hnam tan Asset ropui tak a nih a beisei thu a sawi bawk.

Tribal Research Institute sakna atana Estimate Amount hi cheng nuai 2028.50 a ni a, kum 2019 March thla khan sak tan niin Building Structure 13 a awm a. Zawlbuk, Exhibition Library leh Auditorium, Mizo Lal In (Administrative Building), Conference Hall-te a awm a ni. Heng bakah hian mipa leh hmeichhia 50 ve ve lenna Dormitory awmin VIP Cottage 4 a awm a bawk a. Workshop cum Training Centre a awm dawn bakah Ladeh, Hnanghlai, Puantah leh hnam thil inzirna hmunpui a ni dawn a, Staff Quarters Unit awm bawkin ruahtui khawlkhawmna Tanky tui litre nuai 2 leng siam a ni a. Synthetic thatch (Artificial di) kangmei laka him, USA atanga chahluh hmangin a chung hi khuh vek a ni a, a chhuat leh a building bangte hi mau dap ziarang customized Glaze Tile leh Wall paper bel vek a ni.

TRI hi kan hnam ziarang, kan Culture leh Traditions vawnnun zel nan leh kan hnam chin dan hrang hrang, themthiamna inzirtirna hmunpui a ni dawn a, thiamhnang leh La deh zir bing duh tan mimal leh pawl anga zir theihna tura buatsaih a ni. Nimin-a a hawnna hunah hian Mizo lemziak bakah Mizoram Indigenous Association atangin infiamna bakah themthiamna chi hrang hrang entirna hun neih nghal a ni a. Sawm bikte atangin thusawi ngaihthlak a ni bawk.

Comments

Popular News (Last 30 Days)

Bawngchawm tlang khualbuk rawktu nia hriat mi 2 man