Pathianni-a Vote chhiar tur dodal ngal a ni

Mizoram Assembly Inthlanpui neih hun tur puan a nih hnuah Vote chhiar ni tura ruat chu Pathianni a nih avangin pawl hrang hrang ten an duh loh thu an sawi.

Thla thar November 7-a Mizoram Assembly inthlanpui neiha Vote tla te hi December 3, 2023 (Pathianni)-ah chhiar tura tih niin Mizoram Kohhran Hruaitute Committee (MKHC) Chairman, Rev. Dr. Chawnghmingliana chuan, Mizoram Assembly inthlanpui vote chhiar hun atan ECI-in Pathianni a ruat chu dodal an tum tih a sawi a. Synod Moderator ni bawk, Rev. Dr. Chawnghmingliana chuan, vote chhiar hun atan Pathianni ruat a nih chungchang hi Synod ang pawhin an thlir dawn a, Inrinni -a Officers Meeting-a an ngaihtuah tel nghal tur thu a sawi.

Rorel lai MNF Party chuan, Pathianni-a vote chhiar tura Election Commssion of India in ruahmanna a siam chu an dodal tih thu leh vote chhiar hun chu sawn tura ngenna nimin khan Chief Election Commissioner of India hnenah an thlen nghal a. Congress Party pawhin nimin khan Election Commission-ah thlenin ZPM Working President, K. Sapdanga pawhin an dodal ngei a ngaih thu a sawi a. PC party pawhin vote chhiar ni atana Pathianni ruat a ni chu an pawm lo tih an sawi bawk.