Oct. 27-ah MPF in Common Platform buatsaih leh an tum

Mizoram People Forum (MPF) Serchhip District chuan nimin khan Penial Kohhran Committee Room No. 2-ah Special Executive Meeting neiin Oct. 27-ah Common Platform buatsaih nise an ti.
Serchhip District MPF Special Executive Meeting hi an Chairman Rev. Zohmunmawia chuan kaihhruaiin Assembly Inthlanpui neih tura Serchhip Bial-a Candidate te nena inkawmna chu October 24, 2023-ah Serchhip Kawnpui Kohhran Committee Room No. 2-ah neih nise tiin hetiang bawk hian Constituency Forum leh Joint Forum-ah te pawh hmalak nise an ti a. MPF leh Political Party ten thawhhona an lo siam tawh angin Constituency hrang hrangah Common Platform buatsaih leh relin, Serchhip-ah chuan MPF District Forum in buaipuiin October 27, 2023-ah Serchhip Bazar-ah buatsaih nise an ti a. Assembly Bial dangah chuan Constituency Forum in an remchan anga an buaipui dawn bakah Thenzawl-ah chuan Joint Forum in an lo buaipui dawn bawk a ni.

Serchhip District MPF thukhawm hian Inthlanpui neih a nih dawn hnaih avangin Local Forum hrang hrangte tihchak kawngah hmalak nise tiin Political Party te nen an thawhhona Thuthlung chu a theih anga puanzar nise tiin Constituency Forum-ah a copy pekchhuah nise an ti a, District Forum hruaitute pawhin a remchan angin Local Forum te tlawh thin nise an ti. MPF Serchhip District-a Joint Secretary nilai phatna chu pawm sakin Upa Lalthanzama (Penial Kohhran) chu ruat thar a ni bawk.

He hunah hian MPF hmalakna hrang hrangte an Secretary R. Sanghmingthanga chuan a tarlang a. Kumin a Assembly Inthlanpui lo awm tura inthlanna felfai leh thianghlim a awm theihna tura hma an lakna tura an sum mamawh te MPF a tel pawl hrang hrang ten thawhkhawm leh nise tiin Serchhip Town chhunga Presbyterian Pastor Bial tin bakah Kohhran leh NGO te sum thawh dan tur an ruahman a ni.