Serchhip District-ah Assembly Inthlan chuh turin mi pakhat in Nomination a file

Mizoram Legislative Assembly Inthlanpui neih tur chuh tumte tana hming pekluhna hun hawn a nih hnuah Serchhip District chhunga Assembly Bial pathum (3)-a Nomination File hmasa ber Rev. Dr. Zaichhawna Hlawndo chuan nimin khan 28-Hrangturzo (ST) AC chuh turin Nomination Paper a thehlut.
Zoramthar Lalpa Chhiahhlawh Intelkhawm atanga 28-Hrangturzo (ST) A/C-a Independent-a ding tur Rev. Dr. Zaichhawna Hlawndo hian nimin khan he bial-a Returning Officer tura ruat Serchhip Addl. DC Lalnundika hnenah Nomination paper a thehlut a, ani hi Hrantrurzo Bial bakah Serchhip District chhunga Assembly Bial pathum-a Assembly inthlan chuh tura Nomination paper thehlut hmasa ber niin Serchhip Bial-ah ding tura ruat ni tawh bawk mah se Serchhip Bial-ah hian midang ding tur la ngaihchan mek a ni a, a din dawn leh dawn loh hi hriatchian theih ala ni lo a ni.

Nimin chawhnu lama Nomination Paper a thehluh hnua thuthar thehdarhtute zawhna chhangin Rev. Dr. Zaichhawna Hlawndo chuan, Lalpa'n ‘I pianna ramah kir leh rawh’ a tih anga a pianna leh a seilenna ngei Tuichangral Bial ngei, Hrangturzo-ah Lalpa tan, a Chhiahhlawh ni tura lo ding a nih thu a sawi a. Lalpa'n a Lalram sawrkar Zofate tan dinsak a duh a, chumi atana chhiahhlawh ni tura lo ding a nih thu a sawi a. MLA inthlana a din chhan sawiin, engemaw party Manifesto, an tlin chuan an tih tur lam ni lovin Lalpa'n a lalram sawrkar Zofate tan din sak a duh a, chumi atan chuan Chhiahhlawh (Agent) a mamawh avangin a lo ding ta tih a sawi a. Lalram sawrkar a din veleh Lalpan a ngaih pawimawh hmasak ber tur chu Hnam nihna ‘National Identity Referendum’ a ni dawn tih sawiin, “Keini chuan Kalphung thar tih emaw, Manifesto lam ni lovin Pathian in-a a Hnam fate hi ram min pek hi Independent Nations turin Lalpa'n min buatsaihna tur leh Hrangturzo Bial-ah Pathian lalram a din theihna turin mipui zawng zawng ten Party Vote tawh lova, mihring thlang lal tawh lova Lalpa kan thlanna tur atan bawm ka rawn hung dawn a ni,” tiin an Symbol atan ‘Zungbun’ thlan a nih thu a sawi bawk.

Zawh belhna dang chhangin Lalpa Chhiahhlawh Intelkhawm hruaitu Rev. Dr. Zaichhawna Hlawndo chuan Serchhip District huamchhunga Serchhip leh Tuikum Assembly Constituency-ah pawh Nomination File tur an awm an beisei thu a sawi a, “Ni 3 ni 4 vel ala awm a, beiseina nen kan lo thlir dawn nia,” tiin anmahni a la sawi theih chiah loh thu a sawi bawk.

Nimin thleng khan Serchhip Bial leh Tuikum Bial-ah Nomination paper thehlut an la awm lo thung a, tun tuma Assembly Inthlanpui chuh tumte tan hian tunkar Zirtawpni thleng khian Nomination  paper thehluh theih a ni dawn a ni.

Comments

Popular News (Last 30 Days)

Vawiin-ah HSSLC Exam result

LPG man bithliah thar