Serchhip-ah Polling Party a kal tur thlanna neih a ni

Serchhip District chhunga Assembly inthlanpui nei tura inbuatsaihna kal mekah nimin khan District Election Officer David Lalthantluanga hovin Polling Party 1st Randomisation neih a ni.
Polling Party Randomisation hi tum thum neih tura ruahman niin nimin-a a hmasa berah hian Election-a Duty turte thlanna neih niin Serchhip District chhunga Polling Station 88-a Duty tur bakah Reserved-a awm tur Polling Party 19 thlanchhuah an ni a, heng te hi Presiding Officer (PRO) tur 107, Assistant PRO (APRO) tur mi 107 bawk leh Polling Official tur mi 214 te an ni a, Polling Party pakhat zelah hian PRO leh APRO mi pakhat ve ve bakah Polling Official tur mi pahnih zel an awm anga, heng bakah hian venhimna lam buaipuitu tur dah belh an la ni dawn a ni.

Serchhip District chhunga Assembly Bial pathum-ah hian Polling Station pahnih theuh te chu Hmeichhe hlangin an vil, Pink Polling Station a ni dawn a, 26-Serchhip (ST) AC-ah 26/18-Serchhip VIII (Hmar Veng PS) leh 26/27-New Serchhip V (PCR High School) te niin 27-Tuikum (ST) AC-ah 27/24-Chhiahtlang II (Govt.High School) leh 27/27 Chhiahtlang V (Govt. PS-II) te a ni a. 28-Hrangturzo (ST) AC-ah 28/23 N. Vanlaiphai I (N.Vanlaiphai HSS) leh 28/24 N. Vanlaiphai II (Govt. Oriental MS) te an ni.

Heng bakah hian Assembly Constituency tinah tualchhuak hmanraw hmanga siam leh zia tarlanna Unique Polling Station pakhat tal siam tur a nih angin 26/3 –Thenzawl III (Serchhip AC);  27/26-Chhiahtlang IV (Tuikum A/C) leh 28/3-Biate I (Hrangturzo AC) te chu Unique Polling Station atan hian thlan an ni.

Polling Party Randomisation vawi hnihna hi General Observer hova neih tura ruahman a ni a, a tum thumna leh a huhnung ber tur chu Vote thlak ni (poll day) atang chhiar leta ni thum-ah neih tur niin hetah hian an duty-na tur tihchian a ni tawh dawn a ni.

Comments

Popular News (Last 30 Days)

Vawiin-ah HSSLC Exam result

LPG man bithliah thar