Hripui in min tihbuai tak avangin engemaw chen Family Oriented SEDP pek a khaihlak - Tawnluia

MNF Sr. Vice President Tawnluia chuan Family Oriented SEDP atan cheng vbc. 450 senral a ni tawh tih sawiin, Hripui in min tihbuai tak avangin engemaw chen Family Oriented SEDP pek a khaihlak thu a sawi.

Nimin a Aizawl Mizo Hnam Run-a thuthar thehdarhtute a kawmna ah MNF Sr. Vice President chuan MNF Sawrkar Flagship Programme, Socio-Economic Development Programme (SEDP) chu a theih ang angin chhungtin (Family Oriented) thleng phakin pekchhuah tan chhoh a nih thu sawiin, Mizoram sawrkar chuan SEDP 1st Phase-ah chhungkaw 60,000 hnenah Rs. 50,000/- theuhin a pek thu leh hemi atan hian cheng vbc. 300 senral a nih thu a sawi a. 2nd Phase-ah chhungkaw 60,000 hnenah vek Rs. 25,000/- theuh pek leh niin cheng vbc. 150 senral leh niin 3rd Phase-ah chhungkaw 60000 tho target-in Selection neih chhoh mek a nih laiin inthlan in a nang ta tih a sawi a. Family Oriented SEDP atan hian cheng vbc. 450 hman a nih tawh thu leh Sawrkar hna vuan ve lo mipui nawlpui harsa zawkte ban phakah Mizoram Budget hnuhhniam a ni chu lawmawm a tih thu sawiin, “Mizoram budget, mipui hnen thlengpha a nih zia SEDP Family Oriented kalpui a ni hian a tarlang hle. Hei hian mipui banphak sawrkar kan neihzia pawh a tichiang hle a. Sawrkar atanga thlabi hlawh nei ve lo tan SEDP hi malsawmna a ni takzet a ni,” a ti.

MNF Sr. Vice President chuan MNF Sawrkar tan tirh chhohah khan SEDP chu Pilot Project atan chhungkaw 2000 chuang hnenah pek a lo ni tawh tih pawh sawiin, chhungkaw khatin cheng nuai 3 chuang te an dawng hlawm niin a sawi a. Hripuiin min tihbuai tak avangin engemaw chen Family Oriented SEDP pek hi a khaihlak ta nia sawi bawkin, “MNF-in sawrkar-na a chang leh a nih chuan SEDP hi pek zui zel a ni dawn a, chhungkaw khatin nuai 3 an dawn kim hma chu pek chhunzawm a ni anga, a project a zirin nuai 3 chuang pawh an dawng thei dawn a ni,” tiin “MNF sawrkar chuan SEDP hmang hian kuthnathawktute leh miharsa zawkte leirem rah tir a, khaichhuah hi kan tum nghet tlat a ni,” a ti bawk.

Covid hripui leng avangin vbc. 3000 dawn lai kan sum hmuh tur kan hmu lo nia sawi bawkin Tawnluia chuan, “Kan unau raltlan te avanga buaina, ramri buai, khawchhak lirnghing, Vawkpul hri rapthlak tak, ramkang nasa leh buaina neuh neuh dangte kan ram in kan tawk a. Hun danga thleng ngai lo harsatna hrang hrang kan tawh avang hian kan tum lohna lamah sum hman a tul nasa hle a. Heti chunga mirethei leh kuthnathawktute dinchhuah ve-na tura SEDP pek a ni thei hi a lawmawm takzet a ni,” a ti bawk.

Comments

Popular News (Last 30 Days)

Vawiin-ah HSSLC Exam result

LPG man bithliah thar