Inthlanpui atan Media leh Publicity lama tanlak tul ti

Mizoram Chief Electoral Office-a Addl. CEO H. Lianzela chuan Election kaihhnawih inpuahchahna chak taka kalpui chhoh mek karah Media leh Publicity lamah tanlak zual a tul a ti.

Mizoram CEO hnuaia State Media Cell chu Inrinni khan an Chairman, Addl. CEO H. Lianzela kaihhruaiin a Pisa-ah an thukhawm a, he hunah hian Addl. CEO chuan mipuite vote thlak theuh tura zirtirna SVEEP Campaign kaltlanga neih te chu ngaih pawimawh zual a tul thu a sawi a. Media kaltlanga mipuite hriat tur tul puanzar leh dan palzutna awm theite enfiah reng a tul thu a sawi bawk.

He thutkhawmah hian Social Media leh Media Monitoring Response Team atan Nodal Officer ruat niin, Media Assistant turte ruat an ni a. Chanchinbumite tan October ni 25-ah Media Sensitization Workshop buatsaih nise an ti bawk a. SVEEP Campaign kaltlanga hmalak dan turte, Young Voters' Club din dan turte bakah Media Cell mawhphurhna leh hmalak tulte an sawiho bawk. He hunah hian Member Secretary Henry C. Lalrawnkima, Deputy CEO hnen atangin an hmalakna hrang hranhg report ngaihthlak a ni bawk.

General Election to the Mizoram Legislative Assembly, 2023 neih turah Chief Electoral Officer, Mizoram hnuaiah State Media Cell/Centre dinin mumal taka kalpui a ni a, Inthlan chungchanga thuthar (Media) leh thu thehdarh (Publicity) kaihhnawiha hriat duh neite tan Phone No. 0389-2954392; 8731806897 (Whatsapp); Mobile Phone No. 8787622508 leh Email - mzelectionmedia@gmail.com-ah te hian State Media Cell hi biakpawh theih reng a ni bawk tih sawrkar thuchhuah chuan a tarlang a ni.