Independent MLA 5 te bang

ZPM thlawptu Mizoram-a MLA panga (5) te chuan nimin khan MLA atanga banna an thehlut a, banna thehluttu heng MLA 5 te hian an bial ngai theuh ah MLA inthlan an chuh leh dawn a ni.

Kum 2018 MLA inthlanpui-a Independent Candidate nia thlantlin MLA 5- Aizawl Weat-III Bialtu MLA VL. Zaithanzama, Aizawl North-II Bialtu MLA Dr. Vanlalthlana, Aizawl South-II Bialtu MLA Lalchhuanthanga, Aizawl South-I Bialtu MLA C. Lalsawivunga leh Aizawl North-I Bialtu MLA Vanlalhlana te hian nimin khan Assembly Speaker Lalrinliana Sailo hnenah banna an thehlut a, Speaker hian a lo pawm sak nghal a ni.

ZPM party chuan hemi chungchang ah hian thuchhuah siamin heng MLA panga te hian Dan in a phut anga MLA atanga banna thehlut an ni tih an sawi a. “Kum 2018 MLA General Election dawna ZPM in Election Commission of India hnen atanga recognition an hmuh hman tak loh avanga ZPM Support Independent Candidate a dinga tling ta te an ni a. Tun tum 2023 MLA General Election lo awm turah hian an bial ngai ah theuh ZPM Official Candidate niin an ding leh vek dawn a ni,” an ti bawk. Heng mite ruala Independent-a thlantlin bawk Serchhip bialtu MLA Lalduhoma chu ban a nih hnua bye-election neih ah thlantlin leh niin ZPM in Registration nei-a ZPM Ticket-a thlantlin a nih avangin banna thehluh a ngai ve tawh lo nia thudawn a ni.