Assembly Inthlanpui neih tur hriattirna chhuah dawn

Thla thar November 7-a Mizoram Legislative Assembly Inthlanpui neih tur atan Vawiin hian hriattirna tihchhuah a ni dawn ta a, hemi rual hian inthlan chuh tumte tana hming pekluhna hun hawn nghal a ni ang.
Election Commission of India in Mizoram Legislative Assembly Inthlanpui neih hun atana thla thar November 7 a lo ruat tawh angin Vawiin hian Assembly Constituency tina Returning Officer te chuan an huamchhung ah theuh inthlanpui neih tur hriattirna hi an tichhuak dawn a, Serchhip District chhunga Assembly bial pathum-a Returning Officer te pawhin hemi rual hian hriattirna tichhuakin inthlan chuh tum te tana Nomination File theih hun pawh hawn nghal a ni anga, tun thla ni 20 thlengin Nomination Paper hi thehluh theih a ni ang.

Serchhip District chhunga Assembly Bial pathum atan pawh Returning Officer leh Asst. Returning Officer turte ruatchhuah an ni tawh a. 26-Serchhip (ST) AC-ah chuan Serchhip District Bawrhsap David Lalthantluanga chu RO niin ARO-ah Rebecca Laldinmawii Hrahsel, SDO (Sadar) leh Lalhrualiana Zote, SDC te an ni ang. 27-Tuikum (ST) AC-ah DRDO Project Director HD. Lalpekmawia chu RO niin ARO-ah Rebecca Laldinmawii Hrahsel, SDO (Civil) Thenzawl leh Gaston Vanlalhriatpuia, Settlement Officer, Serchhip te an ni ang. 28-Hrangturzo (ST) AC-ah Serchhip Addl. DC James Lalni-thanga chu RO niin Daniel Sailo, SDO (Civil) North Vanlaiphai leh Dr. Albert Vanlalruata, BDO East Lungdar te chu ARO an ni ang.

Hetianga inthlan hriattirna tihchhuah a nih hnu Vawiin chawhma dar 10:00 hian Serchhip District Election Officer David Lalthantluanga chuan Serchhip-a thuthar thehdarhtute chu Ser-chhiP DC Meeting Hall-ah kawmin inbuatsaihna an kalpui dan te a hrilhfiah dawn a. Hetianga thuthar thehdarhtute kawmna hi inthlanpui vuakvet ah tum nga (5) neih tura ruahman a ni.